Oddvitar Framsóknarflokksins og Sjálfstæðisflokksins á Hornafirði munu eiga fund um mögulega meirihlutamyndun á morgun.
Þetta segir Hjalti Þór Vignisson, oddviti Framsóknarflokksins á Hornafirði í samtali við mbl.is.
Framsóknarmenn unnu góðan sigur í sveitarfélaginu og fengu tæp 45% atkvæða, sem skilaði flokknum þremur fulltrúum af sjö í bæjarstjórninni.
Misstu Kex-framboðið og Sjálfstæðisflokkurinn sitt hvorn fulltrúa til Framsóknar en Kex og Sjálfstæðisflokkur mynduðu áður meirihluta á Hornafirði sem nú er fallinn.
Mjög glöð og kát
Hjalti segist virkilega stoltur og þakklátur fyrir niðurstöður kosninganna.
„Við fundum fyrir miklum meðbyr, við höfðum hitt fjölmargt fólk og farið í heimsóknir þar sem við fundum fyrir velvilja. Maður veit svosem aldrei hvernig fólk kýs en við erum mjög glöð og kát.“
Framsókn er ótvíræður sigurvegari kosinganna í sveitarfélaginu en árið 2022 hlaut flokkurinn tvo fulltrúa en hlaut hreinan meirihluta árið 2018.
„Þessi niðurstaða er einhver blanda af mönnum og málefnum og hvernig menn meta síðastliðin fjögur ár. Það er erfitt að benda á eitthvað eitt sem útskýrir þetta, ég þarf að melta þetta aðeins betur.
Gauti Árnason, oddviti Sjálfstæðisflokks á Hornafirði.
mbl.is/Kristófer Liljar
Bjartsýnn á að klára viðræður
Framsókn þarf fulltingi eins bæjarfulltrúa til viðbótar við sína þrjá til að mynda meirihluta. Hefur flokkurinn því val um það hvort hann leiti til Sjálfstæðisflokksins, Kex eða Miðflokksins við myndun meirihluta.
„Við fórum óbundin inn í þessar kosningar, það er gott fólk á öllum þessum listum og oddvitarnir prýðisnáungar. Ég hef haft samband við oddvita sjálfstæðismanna og við munum setjast niður á morgun og kanna það hvort við eigum flöt til að vinna saman. Ég er bjartsýnn um að við komum því í höfn,“ segir Hjalti.
Hjalti hefur áður verið bæjarstjóri í Hornafirði, á árunum 2006 til 2013. Hann segist hafa fundið löngun til þess að vinna aftur fyrir samfélagið og hafi því tekið þá ákvörðun að snúa aftur í sveitarstjórnarmálin.
