Fjölmiðlanefnd telur að lágmarkskröfur um andsvör séu uppfylltar í máli sem snýst um meint brot Ríkisútvarpsins á fjölmiðlalögum í umfjöllun þess um Pál Steingrímsson, fyrrverandi skipstjóra hjá Samherja, og telur nefndin ekki ástæðu til að aðhafast frekar varðandi þann þátt málsins er snýr að frétt RÚV 19. apríl og ósamræmi milli hennar og fréttar danska miðilsins Berlingske.
Fjallaði fréttin um að Páll og nafni hans Vilhjálmsson bloggari hefðu varað fréttamann RÚV við því að fjalla um íslenskan sjávarútveg. Í birtri frétt Berlingske sagði að haft væri eftir umræddum blaðamanni að Páll hefði ítrekað sent honum og öðrum blaðamönnum óbeinar hótanir.
Hins vegar hafi RÚV ekki brugðist við athugasemdum Páls innan þeirra þriggja sólarhringa tímamarka sem fjölmiðlalög tilgreina. Birti RÚV leiðréttingu og afsökunarbeiðni fyrst átta dögum síðar.
Ókunnugt um breytingar
Í úrskurði nefndarinnar, sem mbl.is hefur undir höndum, segir svo:
Að sögn RÚV var þeim ókunnugt um að breytingar hefðu orðið á drögunum áður en fréttin birtist hjá Berlingske. Það hafi ekki verið fyrr en eftir að kvartandi benti RÚV á að um ósamræmi væri að ræða á milli fréttar RÚV og Berlingske að starfsfólk RÚV áttaði sig á því. Í kjölfarið var fréttin uppfærð með leiðréttingu ásamt afsökunarbeiðni þann 27. apríl 2026. Áðurnefnt ósamræmi laut að því að í upphaflegri frétt sem birtist á vef RÚV kom fram að í frétt Berlingske væri haft eftir tilteknum blaðamanni að kvartandi hefði hótað honum og öðrum blaðamönnum minnst þrisvar sinnum í tengslum við umfjöllun hans um Samherjamálið.
Tók nefndin fram að frétt RÚV hefði verið leiðrétt og afsökunar beðist nokkru áður en Páll kvartaði til hennar vegna málsins 5. maí.
Sjónarmið á framfæri
Um það atriði hvort RÚV hefði átt að veita Páli kost á að koma sjónarmiðum sínum á framfæri við vinnslu fréttarinnar eins og fjölmiðlalög mæla fyrir um segir nefndin að til þess sé að líta að sjónarmið Páls komi skýrt fram í frétt Berlingske auk þess sem þau séu rakin skilmerkilega í frétt RÚV sem hafi verið endursögn á frétt danska miðilsins.
Í ljósi þess sé það mat nefndarinnar að RÚV hafi ekki brotið gegn 1. mgr. 26. gr. laga um fjölmiðla að þessu leyti og því sé ekki ástæða til að aðhafast frekar í málinu á þeim grundvelli.
Téð málsgrein laganna er svohljóðandi:
Fjölmiðlaveita skal í starfi sínu halda í heiðri lýðræðislegar grundvallarreglur og standa vörð um tjáningarfrelsi. [Hún skal virða mannréttindi og jafnrétti, og einnig friðhelgi einkalífs nema lýðræðishlutverk fjölmiðlaveitu og upplýsingaréttur almennings krefjist annars.] Fjölmiðlaveita skal gæta þess að uppfylla kröfur um hlutlægni og nákvæmni [í fréttum og fréttatengdu efni] og gæta þess að mismunandi sjónarmið komi fram, jafnt karla sem kvenna.
