Íris Helga Jónatansdóttir, sem ákærð hefur verið fyrir umsáturseinelti og fleiri brot gegn fjölda fólks, er alls ákærð í 68 ákæruliðum.
mbl.is hefur ákæruna undir höndum.
Stór hluti ákæruliðanna er vegna brota gegn fyrrverandi kærasta Írisar og sambýliskonu hans en einnig er hún ákærð vegna brota gegn foreldrum og bróður fyrrnefndrar sambýliskonu og tveimur öðrum mönnum og dætrum þeirra.
Fóru saman að maka saur á bifreið
Annar maður, sem fæddur er árið 1979, er einnig ákærður með Írisi en hann er sakaður um hlutdeild í ákveðnum brotum Írisar gegn fyrrverandi kærasta hennar og sambýliskonunni auk foreldra og bróður hennar.
Er maðurinn sagður hafa hvatt Írisi áfram en einnig er hann sagður hafa farið með henni að maka saur á hurðarhún á bifreið fyrrverandi kærasta Írisar og sambýliskonu hans er stóð fyrir utan heimili þeirra.
Ákæran er gríðarlöng og eru ákæruliðirnir hátt í sjötíu talsins eins og áður segir. Er hún meðal annars sögð hafa farið að heimili fyrrverandi kærasta síns með krukku sem hún sagði innihalda fóstur sem hún hefði misst.
Hótaði hún manninum öllu illu og kom ítrekað að heimili hans, vann þar skemmdarverk og var til vandræða. Þá dreifði hún miðum og fleiru þar sem varað var við því að maðurinn væri ofbeldismaður og hefði mikið magn barnaníðsefnis í tölvu sinni. Þá bjó hún til ýmsa falska reikninga á samfélagsmiðlum þar sem áreitnin hélt áfram.
Gæti hlotið þungan dóm
Brot Írisar gegn foreldrum og bróður sambýliskonunnar fólust í því að hún sendi þeim skilaboð frá fölskum samfélagsmiðlareikningum þar sem hún hótaði því að eitthvað myndi koma fyrir dóttur þeirra og sambýlismanns hennar og að hún væri að fylgjast með henni öllum stundum.
Þá fólust brot Írisar gegn hinum brotaþolunum meðal annars í ítrekuðu áreiti á samfélagsmiðlum, þar sem hún meðal annars bjó til reikning þar sem hún fjallaði um meinta ofbeldismenn og sagði mennina hafa gerst seka um gróft ofbeldi.
Teljast brot hennar varða við ákvæði hegningarlaga um umsáturseinelti, rangar sakargiftir, skjalafals, hótanir, ærumeiðandi aðdróttanir auk barnaverndarlaga brota.
Á Íris yfir höfði sér allt að 10 ára fangelsi verði hún sakfelld en mál hennar verður tekið fyrir í Héraðsdómi Reykjaness.
