Islândia, Morgunbladid, Islandês

Hún segir að aðferðin sé ekki sú að neyða fólkið í þetta hlutverk heldur fá það til að vilja vera með. „Þú býrð til fyrirtækjamenningu sem snýst um að vilja vernda vinnustaðinn.“

Reynst árangursrík

Klein segir að hjá Swedbank hafi þessi nálgun reynst árangursrík. Innblástur fékk hún frá íbúum hinnar stríðshrjáðu Úkraínu. „Yfirvöld þar mennta og þjálfa borgarana til að efla varnir Úkraínu. Ég lærði mikið af þeim. Með því að fara þessa leið byggirðu upp menningu þar sem fólkið er á verði, tekur eftir óvenjulegum hlutum og bregst við.“

Hún segir að á bak við alla hluti sé fólk. Það sé t.d. á bak við allan forritunarkóða, fjárfestingar og ákvarðanir almennt. „Ef þú færð það til að skilja mikilvægi öryggis verður öryggið hluti af daglegum hugsanagangi þess.“

Spurð nánar um hvernig hún fari að því að hvetja fólkið og halda því við efnið segir Klein að í Swedbank sé unnið mikið með sögur og notast við tungumál viðskiptageirans. „Við erum virkilega að ná að breyta hvernig við miðlum upplýsingum um öryggismál. Við viljum að öryggi verði skemmtilegt og hvetjandi.“

Sífellt minnt á

Hún nefnir stutt skilaboð sem dæmi. „Við birtum til að mynda stuttar áminningar á kaffivélunum. Það vinna rúmlega sautján þúsund manns í bankanum. Ef þú ferð að fá þér kaffi og sérð þar litla orðsendingu meðtekur þú hana og ferð með inn í daginn. Með því að minna fólk á í sífellu með þessum hætti og endurtaka skilaboðin verður fólkið meira vakandi, fremur en að láta það lesa einhverja doðranta um öryggismál.“

Blaðamaður bendir á að þetta hljóti að segja ýmislegt um hvað netöryggismál séu orðin mikilvæg í starfsemi bankans. „Já, við viljum búa til eins konar heilbrigða vænisýki,“ segir Klein og brosir.

Hún segir að samskipti skipti öllu máli. Þau séu lykilatriði í netöryggislandslaginu. Það allra mikilvægasta sé að gera netöryggið skiljanlegt.

Klein kveðst vona að íslenskt bankafók hafi mætt á ráðstefnuna. „Ef við getum haft áhrif á aðra banka til góðs hjálpum við til við að styrkja þanþol alls heimsins.“

Skipulagðar árásir

Klein hefur starfað í tíu ár hjá Swedbank. Hún hefur einnig reynslu af því að vera „góður“ hakkari.

„Ég vann fyrir sænsku þjóðaröryggisstofnunina (s. Försvarets radioanstalt). Ég lærði mikið á að prófa kerfin og gera skipulagðar árásir. Með því að vera hinum megin borðsins og nýta reynsluna á varnarhliðinni skil ég betur hvernig þrjótarnir hugsa og hvernig skuli verjast.“

Klein segir að almennt séu hakkarar ekki að eltast við sérstök fyrirtæki. Þeir hafi aðeins áhuga á veikleikum. Sérstök glæpafyrirtæki finni og selja slíka veikleika og þrjótarnir nýti þá í innbrotatilraunum.

„Glæpahópar græða meira á þessu en eiturlyfjasölu. Þess vegna aukast árásirnar stöðugt. Það er svo auðvelt að ráða tölvuþrjót í vinnu. Við þurfum helst að koma þeim úr þessum bransa og í heiðarlega vinnu,“ segir Klein og brosir.

Spurð um komandi tíma segir Klein að tæknin haldi áfram að þróast og verða betri og áskoranirnar þar með. „En ég er bjartsýn á framtíðina.“