Íslandsmeistarar Stjörnunnar eru komnir yfir í einvígi sínu við Tindastól í undanúrslitum Íslandsmóts karla í körfubolta eftir eins stigs sigur í fyrsta leik í Síkinu á Sauðárkróki í kvöld í rosalegum leik, 96:95.
Þrjá sigra þarf til að fara áfram í undanúrslitin og mætir sigurliðið í þessu einvígi annað hvort Grindavík eða Val.
Tindastóll byrjaði með látum og komst ellefu stigum yfir snemma leiks, 18:7. Stjarnan tók leikhlé og svaraði vel og munaði tveimur stigum eftir fyrsta leikhlutann, 27:25, Tindastóli í vil.
Stjarnan byrjaði annan leikhluta betur og komst átta stigum yfir í stöðunni 42:34. Tindastóll svaraði vel og var munurinn fjögur stig í hálfleik, 48:44, Stjörnunni í vil.
Liðin skiptust á fínum áhlaupum í þriðja leikhluta. Stjarnan náði nokkrum sinnum ágætu forskoti en alltaf svaraði Tindastóll og var staðan 69:68, Stjörnunni í vil, fyrir fjórða og síðasta leikhlutann.
Stjarnan náði átta stiga forskoti snemma í fjórða leikhluta, 78:70, en sem fyrr svaraði Tindastóll og minnkaði muninn í eitt stig, 78:77, þegar fimm mínútur voru eftir.
Þær fimm mínútur voru æsispennandi og eftir sveiflur var það að lokum Seth LeDay sem tryggði Stjörnunni sigurinn með tveimur vítum 4,6 sekúndum fyrir leikslok því Tindastóli tókst ekki að svara hinum megin.
LeDay var stigahæstur hjá Stjörnunni með 27 stig og þeir Pablo Bertone og Luka Gasic gerðu 18 hvor.
Dedrick Basile skoraði 28 fyrir Tindastól og Sigtryggur Arnar Björnsson kom næstur með 17.
