Islândia, Morgunbladid, Islandês

Tók 20 mánuði

„Nú þarf einhver ákærandi að leggjast yfir þetta og kanna hvort málið sé raunverulega búið í rannsókn eða hvort það sé þörf á frekari gögnum inn í það. Ef það er ekki þörf á neinum frekari gögnum þá munum við bara vinna að málinu og taka ákvörðun um afdrif þess,“ segir hann.

Greint var frá því í síðustu viku að rannsókn málsins á rannsóknarsviði lögreglunnar væri loks lokið og að það hefði verið afhent ákærusviði til meðferðar.

Bruninn varð þann 19. október árið 2024, þegar eldur kom upp í álmu sem hýsti neyðarvistun Stuðla, og hefur rannsóknin því tekið rúma 20 mánuði.

Eftir rannsókn lögreglu eru tíu með réttarstöðu sakbornings í málinu. Samkvæmt heimildum Morgunblaðsins nær hópur sakborninga út fyrir Stuðla og Barna- og fjölskyldustofu, sem rekur meðferðarheimilið. Heimildir herma þó að í það minnsta tveir starfsmenn séu í þessum hópi.

Fjöldi sakborninga getur breyst við meðferð á ákærusviði en í framhaldinu verður tekin ákvörðun um hvort gefnar verði út ákærur í málinu.

Spurður hvort til greina komi að flýta meðferð málsins á ákærusviði í ljósi þess hve langan tíma rannsóknin hefur tekið segir Árni Bergur að málið fari inn í sama verklag og önnur mál sem berast sviðinu.

„Mál af þessu tagi eru samt auðvitað tekin fyrr til afgreiðslu en kannski einhvers konar hefðbundnari mál,“ segir hann.

„Þannig að við munum bara leggjast yfir þetta núna fljótlega og greina þetta.“

Mátt fyrirbyggja mannslát

Samkvæmt skýrslu Húsnæðis- og mannvirkjastofnunar (HMS) vegna rannsóknar á brunanum voru alvarlegir annmarkar á brunavörnum á neyðarvistun Stuðla, virkni þeirra og eftirliti, sem höfðu veruleg áhrif á öryggi og mannslíf.

Þá hafði ekki verið brugðist við ítrekuðum kröfum um úrbætur.

Hefðu brunavarnir verið í samræmi við brunahönnun hefði mátt koma í veg fyrir mannslát, samkvæmt niðurstöðum rannsóknar HMS.