Bandaríkjastjórn hyggst veita Kólumbíu eins milljarðs dala, jafnvirði um 120 milljarða íslenskra króna, aðstoðarpakka til öryggismála eftir að hægrimaðurinn Abelardo de la Espriella tók við embætti forseta landsins í gær.
Bandaríska utanríkisráðuneytið greindi frá áformunum seint í gærkvöldi og sagði ríkisstjórn Donalds Trumps ætla að vinna með Bandaríkjaþingi að samþykkt pakkans.
Aðstoðinni er ætlað að styðja nýja ríkisstjórn de la Espriella við að ná sameiginlegum markmiðum ríkjanna á sviði öryggismála og snúa fyrst og fremst að því að beita fjármununum gegn eiturlyfjaframleiðslu í landinu.
De la Espriella, sem er 48 ára milljónamæringur og með bæði bandarískan og kólumbískan ríkisborgararétt, boðaði harða stefnu gegn glæpasamtökum og vopnuðum hópum í fyrstu ræðu sinni sem forseti.
Vill loftárásir á kókaínverksmiðjur
Eftir embættistökuna flaug forsetinn með þyrlu til herstöðvar þar sem hann ávarpaði hundruð hermanna. Þar hét hann því að koma á lögum og reglu og „sigra fíkniefnahryðjuverk“ án miskunnar.
Hann sagði jafnframt að möguleikinn á viðræðum við skæruliðahópa væri fullreyndur. Þar vísaði hann til friðarviðræðna ríkisstjórnar forvera síns, vinstrimannsins Gustavo Petro, við vopnaða hópa í landinu.
De la Espriella hyggst færa Kólumbíu mun nær Bandaríkjunum en verið hefur undanfarin fjögur ár. Hann hefur meðal annars boðist til að heimila bandarískum hermönnum að vera staðsettir í Kólumbíu og vill gera loftárásir á kókaínverksmiðjur í frumskógum landsins.
Bygging fangelsa
Hann hefur einnig boðað byggingu svonefndra risafangelsa og vill eyða kókaplöntum, sem eru hráefni í framleiðslu kókaíns, „með öllum tiltækum ráðum“.
Eitt af fyrstu verkum nýja forsetans verður, að hans sögn, að ganga til liðs við svæðisbundið bandalag Trumps gegn eiturlyfjahringjum, Shield of the Americas.
„Plan Colombia II“
De la Espriella hefur kallað fyrirhugað samstarf sitt við Bandaríkin „Plan Colombia II“, með vísan til umfangsmikils samstarfs Kólumbíu og Bandaríkjanna í upphafi aldarinnar gegn eiturlyfjahringjum og vinstrisinnuðum skæruliðasamtökum.
Upprunalega Plan Colombia tókst að veikja nokkra af helstu vopnuðu hópum landsins en aðgerðirnar leiddu jafnframt til ásakana um alvarleg mannréttindabrot.
Kosning de la Espriella markar mikla hægrisveiflu í kólumbískum stjórnmálum eftir fjögurra ára stjórn Petro, sem var fyrsti vinstrisinnaði forseti landsins.
Mjótt á munum
De la Espriella vann forsetakosningarnar með innan við eins prósentustigs mun og stendur nú frammi fyrir klofnu þingi þar sem flokkar sem styðja hann hafa ekki meirihluta.
Embættistaka hans fór fram í Cali í suðvesturhluta landsins en ekki í þinghúsinu í höfuðborginni Bogotá eins og hefð er fyrir. Öryggisgæsla var mikil og um 11 þúsund hermenn voru kallaðir út vegna athafnarinnar.
Meðal gesta voru Javier Milei, forseti Argentínu, og Todd Blanche, starfandi dómsmálaráðherra Bandaríkjanna. Petro mætti ekki til athafnarinnar.
