Tæplega 800 flugferðum í Þýskalandi var aflýst í dag, sem hafði áhrif á um 100.000 farþega, að sögn talsmanns Lufthansa flugfélagsins, þar sem flugmenn og flugliðar fóru í eins dags verkfall vegna deilna um lífeyrismál.
Flugvellirnir í Frankfurt, Berlín, Hamborg og Düsseldorf urðu sérstaklega fyrir áhrifum, samkvæmt vefsíðum þeirra, en verkföllin höfðu lítil áhrif á flugferðir frá München.
Fordæma verkfallið
Lufthansa fordæmdi verkfallið og „gríðarlega alvarleg og óhófleg áhrif“ þess á farþega. Fyrirtækið sagði að aðalflugfélög Lufthansa, sem og Eurowings, Discover Airlines og fraktflutningar, hefðu orðið fyrir áhrifum.
Stéttarfélag flugmanna, VC, og stéttarfélag flugliða, UFO, sendu bæði út verkfallskall til félagsmanna á þriðjudag.
Krefjast betri lífeyrisréttinda
Flugmennirnir krefjast betri lífeyrisréttinda á meðan UFO sagði að félagsmenn þess væru í verkfalli vegna áætlana um að loka dótturfyrirtækinu CityLine og neitun stjórnenda að semja um félagslega áætlun.
Lufthansa tilkynnti fyrir ári síðan að starfsemi og starfsfólk CityLine yrði flutt yfir í nýtt dótturfyrirtæki og að skera þyrfti niður kostnað vegna skuldastöðu fyrirtækisins.
Arðsemi þess hefur dregist aftur úr helstu evrópskum keppinautum og í september sagði Lufthansa að fækkað yrði um 4.000 störf, eða um fjögur prósent af vinnuafli.
