Loftleiðir hafa þegar flogið með bæði skoska og norska landsliðið í fótbolta til Bandaríkjanna á HM og eiga eftir að fljúga með fleiri landslið.
Árni Hermannsson, framkvæmdastjóri Loftleiða, segir í samtali við mbl.is að flogið hafi verið með liðin í svokölluðum VIP-vélum af gerðinni Boeing 757.
Bæði landsliðin hafa birt myndir af leikmönnunum um borð á Instagram. Þar má meðal annars sjá knattspyrnustjörnurnar Erling Haaland, Martin Ødegaard, Scott McTominay og fleiri þekkta leikmenn.
Fljúga með fleiri lið
Þegar Árni er spurður hvaða önnur landslið Loftleiðir fljúgi með á HM segist hann ekki geta greint frá því að svo stöddu.
Hann segir einnig að fyrirtækið geri ráð fyrir að fljúga með einhver lið heim að móti loknu, en ekkert hafi enn verið staðfest í þeim efnum.
„Við munum reyna að vera með vélarnar tilbúnar til að fljúga liðum heim þegar þau detta úr keppni. Við gerum ráð fyrir að taka að okkur nokkur slík verkefni, en vitum ekki enn hvaða lið það verða. Það er ómögulegt að segja fyrir um hvenær lið falla úr keppni,“ segir Árni.
Hafa flogið með ensk lið áður
„Við erum búin að fljúga með eiginlega öll stærstu liðin í Premier League undanfarin ár,“ segir hann.
„Þegar Liverpool keppti við Galatasaray fórum við tvisvar með þá til Istanbúl. Svo höfum við líka farið með allavega þrjú landslið í undankeppninni á einhverja leiki.“
