Hilmar Veigar Pétursson, forstjóri Fenris Creations, var eindreginn stuðningsmaður ESB-aðildar árið 2014. Hann hefur síðan skipt um skoðun.
Þetta kom fram í ræðu Hilmars Veigars á fundi Áfram Ísland um framtíð nýsköpunar sem fram fór í Grósku síðdegis í gær.
„Ég ætla að byrja á því að vitna í ræðu frá 2014. Þar sagði einn maður: Göngum bara í Evrópusambandið. Tökum upp evru. Þetta er ógeðslega einfalt. Þessi maður var ég. Þetta var á Iðnþingi 2014. Ég var þá jákvæður, smá pirraður á stöðunni hér á Íslandi þegar síðustu viðræður voru að renna út í sandinn. Ég var þarna að ræða kosti og galla þess að ganga í ESB og að íslenska krónan væri okkur ekki til hagsbóta,“ sagði Hilmar Veigar.
„Síðan er ég hér 12 árum síðar og er á leiðinni að fara að kjósa nei við þessari hugmynd að fara aftur að tala við ESB,“ sagði Hilmar Veigar og nefndi ýmsar ástæður fyrir þessari breyttu afstöðu sinni, eins og sjá má í upptöku af ræðu hans hér.
Nefndi hann meðal annars íþyngjandi regluverk innan ESB, mikla grósku á Íslandi og hvernig aðrar álfur væru að taka fram úr Evrópu. Íslendingar þurfi að horfa til þess er þeir taka ákvarðanir sem hafa afleiðingar til langrar framtíðar.
Lítill hagvöxtur innan ESB
Í ræðu sinni í Grósku ræddi Hilmar Veigar meðal annars um lítinn hagvöxt innan Evrópusambandsins og hvernig vægi álfunnar í heimsbúskapnum hefði minnkað á öldinni.
Sú þróun komi meðal annars fram í minna vægi evrópskra fyrirtækja í alþjóðlegu viðskiptalífi, eins og fram kom í samtali Morgunblaðsins sem sjá má hér fyrir neðan.
