GJKKO rrëzon kërkesat e Metës për transmetim live të seancës dhe daljen nga kafazi i qelqtë dhe pranon aksesimin e provave elektronike. Ironia e ish-presidentit me gjyqtaren: Jam banues te 313, gjendja civile i divorcuar
Gjykata e Posaçme ka rrëzuar kërkesën e paraqitur nga Ilir Meta për transmetimin e seancës gjyqësore. Gjatë shqyrtimit të çështjes, gjykata vendosi gjithashtu që, në lidhje me kërkesën për aksesimin e provave elektronike, SPAK-u të krijojë kushtet e nevojshme për vënien e tyre në dispozicion.
Po ashtu, trupa gjykuese refuzoi edhe kërkesën e Metës për të dalë nga kafazi i xhamtë gjatë zhvillimit të seancës.
Vendimet u bënë të ditura gjatë seancës së zhvilluar në Gjykatën e Posaçme, ku po shqyrtohet çështja ndaj ish-presidentit dhe ish-kryeministrit Ilir Meta.
Gjatë kohës që është pyetur nga gjyqtarja për të dhënat personale, Meta është përgjigjur me ironi: Në Tiranë banoj për momentin. Banues te 313. Gjendja civile: beqar, domethënë i divorcuar.
Pjesë nga diskutimi në sallë:
Avokati i Metës: Kam kërkesë paraprake. Kam bërë kërkesë juve një javë më parë për sa i përket kafazit të xhamtë. Ua kam bërë edhe ambasadave, Komitetit Shqiptar të Helsinkit, ndërkohë Avokatit të Popullit s’ia kam bërë, se është kot.
Ndërhyn gjykata dhe i tërheq vëmendjen.
Avokati: Konventën Europiane e përdorni kur ju duhet.
Meta: Unë kërkoj ta rishikoni edhe njëherë çështjen e transmetimit live. Ne kemi këndvështrimin tonë kur vjen puna te kjo çështje. Do t’ju lutesha të shikonit edhe raportin e OSBE/ODIHR-it, ku thuhet se 90% e mediave kontrollohen nga qeveria. Nuk shoh realisht asnjë arsye që ky proces të mos jepet live.
Qeveria është e prirur t’i deformojë faktet. Në këtë mënyrë, populli nuk do të ketë mundësinë të shohë të vërtetën. Këtë çështje s’e kërkoj për veten time, për shkak të funksioneve që kam pasur, por e kërkoj për të gjithë të pandehurit.
