Djúp lægð sem nálgast landið veldur hvassviðri á sunnan- og vestanverðu landinu síðdegis í dag og á morgun. Í kvöld og nótt hvessir á öllu landinu.
„Það er ekki mikil úrkoma sem fylgir þessu í dag en það er aðallega rigning á morgun og svo verður áfram hvasst á morgun,“ segir Hrafn Guðmundsson, veðurfræðingur á Veðurstofu Íslands, í samtali við mbl.is.
Hann segir að vindinn lægi annað kvöld.
Sterkar vindkviður á Snæfellsnesi
Í kvöld er spáð 13-20 m/s á suðvestanverðu landinu og hiti á bilinu 2 til 7 stig. Á morgun verður víða 13-20 m/s.
Þá gætu orðið sterkar vindkviður á Snæfellsnesi í fyrramálið þar sem vindur getur náð 40 m/s í kviðum.
Ekki þykir tilefni til að gefa út veðurviðvaranir vegna þessa. Hrafn biðlar til fólks að sýna varkárni, sérstaklega þeirra sem aka bílum sem taka á sig mikinn vind.
Í næstu viku hlýnar á suðvesturhorninu þar sem hiti verður á bilinu 7-13 stig.
Aðspurður segir Hrafn þetta ekki óvenjulegt á þessum tíma árs.
Fáum við engan snjó í Reykjavík á næstunni?
„Nei, það er ekki að sjá í kortunum. Það er ekki að sjá á næstunni. En það er mikið eftir af vetrinum svo það er ekki útilokað að hann komi á endanum,“ segir Hrafn.
