Byltingarvörður Írans sagði í dag að þeir myndu ekki opna Hormússund að nýju fyrr en Bandaríkin uppfylltu skilyrði Teheran sem þau settu fram í gær, á meðal skilyrðanna eru bætur fyrir stríðsskaða.
Stjórnvöld í Íran hafa beitt hafnarbanni á Hormússundi síðan Bandaríkin og Ísrael gerðu árás í lok febrúar og vilja innheimta tolla fyrir siglingar um sundið.
Ítrekaðar árásir á siglingaleiðinni leiddu til þess að vopnahlé frá því í apríl fór út um þúfur. Sáttasemjarar hafa hvatt báða aðila til að snúa aftur að skilmálum síðara minnisblaðs frá því í júní sem lagði grunn að friðarviðræðum.
Abbas Aragchi, utanríkisráðherra Írans, sagði að viðræður við Óman um flutninga og stjórnun sundsins væru að nálgast lokastig, en bætti við að enduropnun Hormússunds væri háð öðrum skilyrðum og bótum fyrir brot á júnísamkomulaginu.
Gerir ýmsar kröfur
Hann neitaði því á sunnudag að Íran væri í samningaviðræðum við Bandaríkin og sagði að þau væru aðeins að skiptast á skilaboðum í gegnum milligöngumenn.
Mohammad Bagher Zolghadr, öryggismálastjóri Írans, lagði í gær fram lista yfir kröfur til að sundið yrði opnað að nýju, þar á meðal að stríði og árásum gegn Íran og bandamönnum þess í Líbanon, Palestínu, Jemen og Írak linni.
Hann krafðist þess einnig að gagnhafnarbanni Bandaríkjanna á íranskar hafnir yrði aflétt, að viðskiptaþvingunum lyki, að frystar eignir yrðu gefnar lausar og að bætur fyrir stríðsskaða yrðu greiddar.
Gerðu árás á olíuskip
Byltingarvörður Írans sagði einnig í dag að stefna þeirra væri að halda lokuninni „þar til óvinurinn samþykkir öll skilyrði okkar. Sundið er nú í raun stríðsvettvangur fyrir okkur en ekki bara siglingaleið.“
Umferð um Hormússund hefur dregist verulega saman þar sem Íran ræðst á skip sem það sakar um að sniðganga þá leið sem það kýs um íranska lögsögu.
Utanríkisráðuneyti Sameinuðu arabísku furstadæmanna fordæmdi í gær árás Írana sem beindist að tankskipi í eigu Abu Dhabi National Oil með flugskeyti á meðan það sigldi um Hormússund.
