Islândia, Morgunbladid, Islandês

“Hér er ég að hanna og framleiða heila stofu alveg frá grunni, allt frá stærri húsgögnum niður í hnífapör, glös og textíl sem er heilmikil áskorun. Á síðustu stundu ákvað ég svo að bæta við hátölurum…”


mbl.is/Eyþór

Um samhengi hlutanna

„Hér er sjónum einna helst beint að efnisheimi og efnismenningu. Ég datt til að mynda í skrif japanska rithöfundarins Tanizaki frá millistríðsárunum sem fjallar um áhrif hnattvæðingar á japanska fagurfræði og hvernig samhengi hlutanna er byrjað að glatast á þeim tíma en heimurinn er orðinn miklu hnattvæddari nú.

Tanizaki tók m.a. dæmi um japönsku keramíkina, „lacquerware“, sem er háglanskeramík með rauðum eða svörtum tónum og hvernig sú áferð og litur verður til í samhengi umhverfisins, bæði út frá loftslaginu en líka hvernig fólk lýsti híbýlum sínum á þessum árum. Þegar ljósaperan kemur, vestræna rafmagnsljósið, þá missir þessi hlutur samhengi sitt.

Það var áhugavert að skoða norræna hönnun út frá sömu hugmyndum. Húsgögnin sem við þekkjum úr skandinavískri hönnun eru líka bundin við menningarlegar forsendur eins og til dæmis hæð borða sem skýrist út frá félagslegum samskiptum. Þetta ratar allt inn í efnisheiminn, húsgögnin og fagurfræðina. Húsgögnin verða síðan vinsæl á heimsvísu og gjarnan talað um skandinavískan mínimalisma sem verður að einhverju normi, að einhverri hlutlausri pallettu, en er í raun bara til út frá þeim forsendum sem eru við lýði hér. Ég er aðeins að leika mér með þetta.“

Takið eftir hnífapörunum.


mbl.is/Eyþór

Allt gert frá grunni

„Ég er með bakgrunn þar sem ­tveir mjög ólíkir efnisheimar mætast. Þetta eru hlutir sem ég er stöðugt meðvitaður um því andstæðurnar eru miklar og ég sé þær birtast svo skemmtilega í umhverfi okkar en ég held að fólk almennt kveiki ekki á því. Ef þú ert alinn upp á Íslandi þá ertu ekkert endilega að leiða hugann að því af hverju þetta er svona eða hinsegin.

Ég sé t.d. að það sem kveikir í mér sem hönnuður er ekki einhvers konar blanda af þessum tveimur heimum heldur verður til eitthvert algjörlega nýtt mengi sem stýrir minni sýn og ég er að reyna að koma þeirri sýn í form,“ segir Logi Pedro sem er af íslenskum og angólskum uppruna.

“Það að búa til alla þessa ólíku hluti var því í heild gríðarleg áskorun en um leið það skemmtilegasta við verkefnið.”


mbl.is/Eyþór

Þú hannar og framleiðir hvern einasta hlut frá grunni. Hefur það gengið átakalaust fyrir sig?

„Þetta eru náttúrulega endalausar áskoranir. Það sem ég hins vegar bjó að þegar ég hóf þessa vinnu var að ég hafði t.d. gert fjórar eða fimm útgáfur af hægindastólnum, bæði í útskriftarverkefninu mínu og seldi auk þess nokkur eintök af honum til 66°Norður. Hann hafði því verið í vöruþróun nokkuð lengi.

Hér er ég að hanna og framleiða heila stofu alveg frá grunni, allt frá stærri húsgögnum niður í hnífapör, glös og textíl sem er heilmikil áskorun. Á síðustu stundu ákvað ég svo að bæta við hátölurum og það var mjög krefjandi að setja sig inn í hljóðverkfræðina sem liggur þar að baki, lóða saman rafrásir, jafna tíðnir og svo framvegis en úr varð vara sem er í algjöru uppáhaldi hjá mér á þessari sýningu. Það að búa til alla þessa ólíku hluti var því í heild gríðarleg áskorun en um leið það skemmtilegasta við verkefnið.“

Logi Pedro er menntaður hönnuður og starfar í fullu starfi sem iðnhönnuður hjá Össuri. Samhliða hannar hann eigin muni auk þess sem hann starfar í tónlist og leiklist.


mbl.is/Eyþór

Kafaði djúpt í fræðin

„Ég var heppinn með samstarfsaðila og frábært að fá að vinna náið með þeim og sjá hlutina verða að veruleika og í heild hefur þetta verið mjög skemmtilegt ferli. Ég hef sökkt mér í fræðilega hlutann og fyrir mig sem hönnuð er gaman að geta kafað djúpt í fræðin en á endanum er ég samt að reyna að búa til eitthvað sem talar umsvifalaust til fólks. Það á ekki að þurfa að lesa sér til um mínar hugleiðingar til þess að fá einhverja upplifun.

Við hér á Íslandi erum ekki vön því að kaupa mikið af íslenskri framleiðslu en það er gaman að sjá hvað það er í rauninni stutt í að við gætum verið að framleiða meira. Hér búum við að svo mikilli þekkingu og hæfileikum og maður bíður eftir því að til verði stökkpallur til þess að framleiða vörur á alþjóðlegum skala.“

Um hátalarana segir Logi það hafa verið mjög krefjandi að setja sig inn í hljóðverkfræðina sem liggur þar að baki, lóða saman rafrásir, jafna tíðnir og svo framvegis en úr varð vara sem er í algjöru uppáhaldi.


mbl.is/Eyþór

Flestir þekkja þig úr tónlistinni en svo hefurðu einnig verið að leika og hanna. Hvaðan kemur þessi drifkraftur og hvað togar mest í þig?

„Góð spurning. Ég hef allt mitt líf verið í mjög skapandi ferlum og bjó að mjög mikilli reynslu þegar ég hóf hönnunarnámið. Ég náttúrulega byrja ungur í tónlistinni en Retro Stefson fagnar 20 ára afmæli sínu nú um þessar mundir, og það hvernig ég nálgast tónlist hefur alltaf verið út frá ákveðnu kerfi sem ég er með í hausnum og það kerfi hefur einnig nýst mér vel í hönnun.

Síðan þá hef ég fengist við mörg skemmtileg hönnunarverkefni og starfa sem iðnhönnuður hjá Össuri og rek auk þess eigin stofu, Lopedro. Mér finnst gaman hvað öll þessi listform nýtast vel og tala vel saman. Það getur náttúrulega verið mjög fyndið að gefa út rapptónlist og mæta svo beint upp í Össur á einhvern fund en það er svo mikið frelsi fólgið í því að leyfa sér að vera nákvæmlega eins og maður vill vera,“ segir Logi en sýning hans stendur til 17. maí og finna má fleiri myndir af hönnun hans á menningarvef mbl.is.