Bënte 8 kilometra në këmbë për të arritur te nxënësit në fshatin e largët, ndërron jetë mësuesi 55-vjeçar në Maliq
Ka ndërruar jetë pas një infarkti mësuesi në Maliq, i cili dyshohet të jetë rreth moshës 55-vjeçare.
Sipas informacioneve, ngjarja ka ndodhur në fshatin Marjan ku një mësues nga rrethi i Devollit, i cili punonte në këtë zonë, u gjet i pajetë në rrugë.
Mësuesi Alban Bejleri ndërroi jetë pas një ataku kardiak, duke lënë pas një shembull të rrallë sakrifice në shërbim të dijes. Çdo ditë, ai përshkonte në këmbë 7 deri në 8 kilometra në terren të vështirë, vetëm për të mbërritur në shkollë dhe për të hapur derën e dijes për nxënësit e tij.
Mësuesi Alban Bejleri
Prej pesë vitesh, Bejleri kishte zgjedhur të jetonte në këtë zonë të thellë, duke iu përkushtuar misionit të tij fisnik edhe pse në bankat e klasës e prisnin vetëm dy nxënës. Për të, numrat nuk kishin rëndësi çdo fëmijë meritonte arsim dhe vëmendje, dhe ai ishte i vendosur ta garantonte këtë me çdo kusht. Me mbi tre dekada eksperiencë në arsim, ai mbeti deri në fund një figurë frymëzuese e mësuesit që nuk dorëzohet.
Largimi i tij ka sjellë dhimbje të thellë tek familjarët dhe kolegët, por edhe zemërim për kushtet në të cilat punojnë mësuesit në zonat rurale. Historia e Alban Bejlerit nuk është vetëm një lajm i trishtë, por një thirrje e fortë për më shumë vëmendje, mbështetje dhe dinjitet për ata që mbajnë gjallë arsimin edhe në skajet më të largëta të vendit.
Mësuesi Alban Bejleri ushtronte profesionin në shkollën e fshatit Marjan, një zonë e largët e Maliqit.
Ecte çdo ditë disa kilometra me këmbë, pasi makina nuk shkonte deri në fshat.
Pas procesit mësimor, rrugës për tek makina, mësuesi dyshohet se ka pësuar infarkt dhe ka ndërruar jetë.
Bashkia Devoll shprehu ngushëllimet më të sinqerta për ndarjen e parakohshme nga jeta të mësuesit Alban Bejleri.
“Humbja e tij është një dhimbje e madhe jo vetëm për familjen dhe të afërmit, por edhe për gjithë komunitetin arsimor dhe qytetin tonë. Ai do të kujtohet si një mësues i përkushtuar, i palodhur dhe shembull frymëzimi për brezat që edukoi me përkushtim.
Në këto momente të vështira, jemi pranë familjes Bejleri dhe u shprehim mbështetjen tonë të plotë”- deklaroi bashkia.
