Lundapysjur leita reglulega til Reykjavíkur í lok sumars en nokkrar hafa vakið athygli Vesturbæinga síðustu daga þar sem þær hafa ráfað um í reiðileysi á milli bíla. Þá fannst ein hjá leikskólanum Grandaborg í síðustu viku.
Umræður um pysjurnar sköpuðust við færslu í Facebook-hópnum Vesturbærinn, þar sem íbúi greindi frá því að hann hefði fangað eina á horni Fornhaga og Hjarðarhaga í gær og sleppt út á sjó.
Fuglafræðingur segir segir það merki um að lundinn hafi nóg æti, að pysjurnar sjáist í borginni. Það gerist reglulega, en ekki á hverju ári. Þær hafi jafnvel sést á Tjörninni í Reykjavík.
Þessari pysju var bjargað í gærkvöldi.
Skjáskot úr myndskeiðinu
Stórt og mikið varp í Akurey
Stórt og mikið lundavarp sé í Akurey. Þá verpi lundinn líka í Engey og Lundey og hugsanlega í Viðey. Það sé því ekki langt fyrir þær að fara.
„Þetta er eins og með pysjurnar í Eyjum, þær sækja í ljósin í bænum hér eins og þar,“ segir Jóhann Óli Hilmarsson fuglafræðingur í samtali við mbl.is.
„Það er gott að vita að það eru pysjur á ferðinni. Þær hafa þá fengið að éta og hafa náð að vaxa og dafna,“ segir hann jafnframt.
Hér er ein pysja á vappinu á horni Seljavegar og Vesturgötu.
Ljósmynd/Aðsend
Um að gera að fanga þær
Jóhann hvetur fólk til að fanga pysjurnar og hjálpa þeim út á sjó, líkt og Vestamanneyingar gera. Öðruvísi lifi þær ekki af.
„Þær eru bara í reiðileysi á steinsteypunni. Það er um að gera að sleppa þeim út á sjó.“
Hann telur að pysjutímabilinu fari þó að ljúka, en það geti verið breytilegt eftir fæðunni.
Þessi fannst á horni Fornhaga og Hjarðarhaga.
Ljósmynd/Aðsend
Pysjan var fönguð og henni sleppt út á sjó.
Ljósmynd/Aðsend
