Hnökrar komu upp í framkvæmd þess að grunnskólar Reykjavíkurborgar taki við upplýsingum um nemendur í 7.–10. bekk unglingadeildar vegna gjaldfrjálsra ferða með Strætó í maí og júní. Stefnt er að því að gjaldfrjálsar ferðir ungmennanna geti þó hafist eftir helgi.
Greint var frá því í gær að Reykjavíkurborg hefði frestað áformum um að öll reykvísk börn á grunnskólaaldri fái að ferðast frítt með Strætó, að því er virtist fram á haust, en fyrirhugað var að börnin gætu sótt um tímabilskort í Klapp-appi Strætó í maí og júní.
Í tilkynningu frá Reykjavíkurborg segir nú að í ljósi skráningar og meðferðar persónuupplýsinga sem berast Strætó sé nú verið að setja upp stafræna lausn þar sem foreldrar geta sótt um kort fyrir börnin sín.
Þá standi til að foreldrar fái sendar upplýsingar eftir helgi um hvernig þeir geti nálgast skráningarformið.
