„Það er langur aðdragandi að þessum tillögum sem byggja í grunninn á greiningarvinnu frá árinu 2024 en þá fékk ég utanaðkomandi ráðgjafa, HLH-ráðgjöf, til þess að rýna í rekstur borgarinnar, stjórnskipulag og sérstaklega málaflokk fatlaðs fólks.“
Þetta segir Einar Þorsteinsson, formaður borgarráðs og oddviti Framsóknarflokksins í borgarstjórn Reykjavíkur, en borgarráð samþykkti í dag tillögu borgarstjóra um umfangsmiklar breytingar á stjórnskipulagi velferðarsviðs og skóla- og frístundasviðs sem leiða til uppsagna 86 starfsmanna.
Af þeim fá 32 starfsmenn boð um ný eða breytt störf en 54 starfsmenn munu ekki fá áframhaldandi starf.
Vinda ofan af hallarekstri síðasta meirihluta
„Heildarúttekt á borginni leiddi í ljós að það voru mikil tækifæri til þess að nýta fé betur, styrkja faglegt starf og bæta rekstur með breytingum á stjórnskipulaginu,“ segir Einar.
Segir hann tillögurnar á sínum tíma hafa spilað inn í það þegar meirihluti sá sem hann sjálfur fór fyrir hafi sprungið.
„Ég lýsti því yfir eftir meirihlutaslitin að þá hefði ekki verið stuðningur við að ráðast í róttækar breytingar á rekstri og stjórnskipulagi borgarinnar og það spilaði sannarlega inn í það. Þessi meirihluti núna stofnaði hagræðingarhóp sem fékk þessa greiningarvinnu í hendurnar og tillögur.
Greiningarvinnan á sínum tíma fólst í því að rýna fjármálalegar upplýsingar og síðan eiga samtöl við starfsfólk úti í hverfum borgarinnar, á miðstöðvunum og í stofnunum borgarinnar. Þannig að þegar við byrjum á þessu kjörtímabili að rýna hvernig við getum efnt loforð okkar til kjósenda um að draga úr yfirbyggingu, einfalda stjórnsýslu, reka, bæta og styrkja faglegt starf og bæta þjónustuna þá bjuggum við að þessum gögnum.“
Einar segir þá meirihlutann og hagræðingarhópinn hafa unnið að útfærslunni og niðurstaðan svo birst í tillögunum sem samþykktar voru í borgarráði í morgun.
„Ég er algjörlega sannfærður um að þetta mun bæta þjónustuna, þetta mun styrkja okkar faglega starf og draga úr kostnaði. Það er gríðarlega sterkt ákall um þetta, held ég, enda erum við að vinda ofan af hallarekstri eftir síðasta meirihluta.“
Hagræðingarhópurinn heldur áfram sínu starfi
Segir hann að nú muni hagræðingarhópurinn halda áfram sínu starfi. Sagt hafi verið að borgin sé í breytingarfasa og þá að sjálfsögðu allt undir.
„Við viljum vanda okkur og vinna tillögurnar vel og alltaf er markmiðið að bæta þjónustuna, framlínuþjónustu við íbúa og draga úr kostnaði á sama tíma. Það er ekkert alltaf hægt að gera það en það er tækifæri í Reykjavík. Það hefur ekki verið ráðist í svona róttækar breytingar um langt skeið.
Við getum líka aðeins horft yfir sviðið og séð hvað hefur breyst á undanförnum 10–15 árum. Nú eru rafrænar lausnir, stafrænar þjónustuleiðir inn í borgina, miklu aðgengilegri heldur en áður. Almenningur vill nálgast þjónustuna rafrænt og fá síðan þjónustu út í hverfin. Það er akkúrat það sem við erum að gera.
Við erum að draga stjórnunina inn í Borgartún og Bíldshöfða en loka þessum stjórnunareiningum úti í hverfunum. Ráðgjafarnir okkar, fagfólkið okkar sem er í beinni snertingu við börn, fjölskyldur, eldri borgara og þá sem þurfa á félagsþjónustu að halda, eru mikið til að vinna áfram úti í hverfunum því ráðgjöfin fer þar fram í leik- og grunnskólum, á heimilum og víða í húsnæði borgarinnar. Þannig viljum við hafa það og þannig tryggjum við nærþjónustuna,“ segir Einar.
Til samanburðar segir hann að benda megi á að Vinnumálastofnun, Tryggingastofnun, VIRK og Sýslumannsembættið séu allt mikilvægar stofnanir sem fólk getur ekki verið án og þjónusti fólk í viðkvæmri stöðu rétt eins og þær einingar sem borgin er að loka.
„Þessar stofnanir eru ekki með útibú í öllum hverfum borgarinnar en það er vegna þess að raunveruleikinn hefur breyst.“
Útilokar ekki frekari aðgerðir
Einar segir aðspurður ekki hægt að útiloka að keimlíkar aðgerðir verði kynntar á öðrum sviðum innan borgarkerfisins. Greiningarvinnan verði að leiða í ljós hvaða tækifæri séu til þess að einfalda stjórnkerfið og bæta rekstur.
„Við byggjum þetta á gögnum og greiningarvinnu og þannig höldum við áfram.“
Hann segir markmiðið að gera rekstur borgarinnar sjálfbæran en nú sé verið að kljást við umtalsverðan halla eftir „útgjaldafyllerí“ síðasta meirihluta sem samþykkti hverja útgjaldatillöguna á fætur annarri síðustu mánuðina fyrir kosningar án þess að fjármagn fylgdi með.
„Það er grafalvarlegt þegar stjórnmálamenn haga sér þannig og nú er það okkar hlutverk að vinna á þeim halla, snúa rekstrinum þannig að hann sé sjálfbær af því að markmiðið er að veita góða þjónustu, halda áfram að fjárfesta og halda áfram að þróa borgina þannig að Reykvíkingar séu stoltir af borginni og að þeir fái þá þjónustu sem þeir þurfa á að halda.“
