Gunnar Helgason barnabókahöfundur hjólar í stjórnvöld í færslu og segir ekkert að marka diguryrði ríkisstjórnarinnar um aukið læsi og menntun barna.
Ástæðan er 82,2 milljóna króna lækkun framlaga til Bókasafnssjóðs í fjárlögum fyrir næsta ár. Þau voru áður 224,5 milljónir króna en nú 142,3 milljónir. Framlag til sjóðsins var hækkað í fyrra um 78,5 milljónir króna.
Margrét Tryggvadóttir, formaður Rithöfundasambandsins sagði við mbl.is fyrr í kvöld að lækkunin kæmi sér einkar illa fyrir barnabókahöfunda.
Gunnar vandar Loga Einarssyni, menningar-, nýsköpunar- og háskólaráðherra, ekki kveðjurnar og segist vera kominn með nóg af kurteisi.
Logi Einarsson, menningar-, nýsköpunar og háskólamálaráðherra.
mbl.is/Anton Brink
„Sjálfur ertu með löngutöng á lofti“
„Þakka þér kærlega fyrir. Og hoppaðu upp í …
(Ég nenni ekki að vera kurteis enda ertu með löngutöng á lofti sjálfur. Þegar stjórnmálafólk telur að það geti rifið af okkur tekjurnar aftur og aftur … ÞAÐ er dónaskapur!!)“
Þetta segir Gunnar sem skýtur föstum skotum að yfirvöldum.
„Það er greinilega ekkert að marka neitt sem þið segið þegar þið talið um að auka læsi og menntun barna. Því að ef það er stöðugt hoggið í tekjurnar mun verða atgervisflótti úr okkar geira. Menningin býr til 17 milljarða í tekjur fyrir ríkið. Og þið bara verðið að klípa launin af lægst launuðu stétt landsins: barnabókahöfundum.“
Undir lok færslunnar segir hann að Þorgerður Katrín Gunnarsdóttir utanríkisráðherra og Kristrún Frostadóttir forsætisráðherra megi skammast sín. Hann segist þó geta treyst á Lilju Dögg Alfreðsdóttur, formann Framsóknarflokksins og fyrrum menntamálaráðherra, og Bryndísi Haraldsdóttur þingmann Sjálfstæðisflokksins.
Sakar Loga um stjórnarskrárbrot
Gunnar spyr Loga hvort hann hafi gleymt fyrra samtali þeirra sem hafi átt sér stað þegar barnabókahöfundar lögðu fram greinargerð frá lögmannsstofunni Rétti.
Hún hafi verið þess efnis að fyrri lækkun á sjóðnum árið 2014, af hendi þáverandi fjármálaráðherra Bjarna Benediktssonar, hafi verið brot á stjórnarskrá Íslands.
„Þér til upprifjunar var þetta svona: Hljóðbókasafnið og útlán þess voru sett undir Bókasafnssjóð árið 2021 vegna þess að það að lána bækur í hljóðbókarformi – án þess að greiðslur fengust fyrir – var stjórnarskrárbrot. (72. grein)
Lilja Alfreðsdóttir hækkaði þá upphæðina til samræmis við fjölgun útlána. Bjarni Ben lækkaði hana sem sagt og Réttur komst að því að það væri sjórnarskrárbrot.
Þú hækkaðir upphæðina í fyrra en lækkar hana aftur nú. Af hverju? Þú ert að brjóta stjórnarskrána, að mati Réttar. Og þú veist það,“ segir Gunnar.
Daði Már Kristófersson, fjármála- og efnahagsráðherra kynnir fjárlagafrumvarpið ásamt Kristrúnu Frostadóttur.
mbl.is/Eggert
Komi verst við barnabókahöfunda
Gunnar segir lækkun framlaganna koma verst við barnabókahöfunda. Fimm vinsælustu höfundarnir á bókasöfnunum skrifi barnabækur.
Hann bendir á að markhópurinn sé þar að auki minni, stundum aðeins nokkrir árgangar, og því vonlaust að lifa á bóksölunni einni.
Hann segist sjálfur hafa verið mjög lánsamur að hafa fengið listamannalaun ólíkt flestum barnabókahöfundum.
„Og nú ætlarðu að taka af 36% prósent af þeim tekjum sem við fáum fyrir höfundarverk okkar í útláni,“ segir hann.
