Matvælastofnun (MAST) hefur breytt verklagi sínu eftir að stofnuninni bárust ábendingar um að gögn úr eftirlitsskýrslum með veiðum Hvals hf. væri mögulega nýttar í annarlegum tilgangi.
Stofnunin safnar ekki lengur upplýsingum um nákvæma staðsetningu á því hvar Hvalur veiðir langreyðar.
Þetta segir Hrönn Ólína Jörundsdóttir forstjóri MAST í samtali við mbl.is.
Kristján Loftsson, eigandi og forstjóri Hvals, sendi tölvupóst á Hrönn og fjölmiðla síðdegis í dag þar sem sagði að fyrirtækið hefði rökstuddan grun um að eftirlitsskýrslur með velferð dýra við hvalveiðar hefðu verið afhentar skipinu Bandero.
Í skýrslunum er að finna nákvæma staðsetningu á veiddum langreyðum og út frá því er hægt að draga ályktanir um hvar skip Hvals hf. halda sig til veiða.
Bandero ekki óskað eftir skýrslunum
Þessu verklagi hefur nú verið breytt og er nákvæm staðsetning á veiddum langreyðum ekki lengur skráð í skýrslur MAST.
Hrönn segir að stofnuninni sé skylt að afhenda eftirlitsskýrslurnar á grundvelli upplýsingalaga, svo lengi sem það brjóti ekki á persónuverndarlögum.
Aðspurð segir Hrönn að Bandero hafi ekki óskað eftir umræddum eftirlitsskýrslum. Hafi skýrslurnar komist í hendur skipverja Bandero hafi þær borist þeim á annan hátt.
„Við erum allavega búin að koma í veg fyrir að þetta komi fyrst frá okkur. Svo er náttúrulega bara gríðarlega alvarlegt að þeir sem fá þessi gögn afhendi þau áfram. Ábyrgð þeirra er náttúrulega gríðarlega mikil,“ segir Hrönn.
Munuð þið setja ykkur í samband við þá sem hafa fengið þessi gögn afhent og árétta að nota þau ekki í þessum tilgangi?
„Við þurfum bara að skoða hvernig við meðhöndlum frekari beiðnir og rýna aðeins betur í verklag og hvernig við bregðumst við.“
Hrönn Ólína Jörundsdóttir, forstjóri Matvælastofnunar.
Samsett mynd
Ný staða
Áhöfn Bandero, sem er í eigu Paul Watson-samtakanna, hefur heitið því að stöðva hvalveiðar við Íslandsstrendur með öllum tiltækum ráðum.
Paul Watson hefur kallað aðgerðina við Íslandsstrendur Aðgerð 86 og vísar í aðgerðir Watsons árið 1986 þegar skipum Hvals var sökkt við Reykjavíkurhöfn.
Í tölvupósti Kristjáns til Hrannar sagði að upplýsingar um nákvæma staðsetningu veiddra langreyða, og þá staðsetningu skips Hvals, ógnuðu öryggi sjómanna Hvals.
„Það má líka segja að þessi staða sem við erum í núna, þar sem það er aðili í íslenskri lögsögu sem er að vega og meta hvort hann geti stöðvað löglega starfsemi á hættulegan máta, sé ný,“ segir Hrönn.
