Íslenskt skólakerfi snýst ekki eingöngu um að skrifa, lesa og reikna að sögn Guðjóns Hreins Haukssonar, formanns Félags framhaldsskólanema. Taka þurfi meira tillit til list- og verknáms í umræðu um skólakerfið.
„Skólarnir verða að sinna öllum námsþörfum nemenda og þeir hafa mjög mikilvægu hlutverki að gegna og mjög víðu hlutverki. Það er ekki gott ef við í umræðu um skólamál smættum skólana niður í bara lestur, skrift og reikning,“ segir Guðjón í samtali við mbl.is.
Mikið brottfall úr framhaldsskólum
Eins og mbl.is fjallaði um í vikunni er brotthvarf íslenskra nemenda úr framhaldsskólanámi nú hið hæsta í Evrópu og hefur staðið í stað frá árinu 2020.
Fjármagnsskortur til verknáms er talinn meginorsökin, en vegna stóraukinnar aðsóknar þurfa verknámsskólar að vísa hundruðum eldri umsækjenda frá á ári hverju, þar sem nemendur beint úr grunnskóla njóta forgangs.
Guðjón Hreinn Hauksson, formaður Félags framhaldsskólakennara.
Ljósmynd/Aðsend
Innviðir ekki nógu sterkir
„Starfsnám, þessar verklegu og skapandi greinar, þarf að fá miklu meira vægi,“ segir Guðjón. Starfsnám hafi verið vanrækt hér á landi og því þurfi að breyta.
„Innviðirnir eru bara ekki nægilega sterkir. Það vantar aðstöðu og fagfólk til að kenna og við erum bara að bíta úr nálinni með það.“
Að lokum tekur Guðjón fram að hann fagni því að umræða uppbyggileg umræða um skólamál sé komin af stað hér á landi.
