Dyshime për lidhje me drejtorët e Veliajt, Rama refuzon projektin e 5D për të ndërtuar kompleks turistik në Himarë
TIRANË– Kryeministri Edi Rama ka refuzuar një projekt të firmës 5D, për të ndërtuar një kompleks turistik në zonën e Himarës. Kompania 5D ka qenë subjekt i hetimeve të Prokurorisë së Posaçme, pas dyshimeve se pas saj qendronin drejtorë të Bashkisë së Tiranës, një pjesë e të cilëve u arrestuan me bujë, ndërsa në pak muaj rifituan lirinë.
Sipas dokumenteve që janë publikuar nga Vox Neës, në datën 13 maj 2026, qeveria ka zbardhur vendimin për t’i refuzuar lejen e ndërtimit kompanisë 5D.
“Këshilli Kombëtar i Territorit dhe Ujit vendosi refuzimin e lejes së ndërtimit për objektin ‘kompleks turistik 1-2 kate, me 3 kate nëntokë’, me vendndodhje në bashkinë Himarë, me subjekt zhvillues shoqërinë ‘5D Konstruksion’” thuhet në dokument.
Kompania në fjalë, ligjërisht figuron në pronësi të shtetasit Nestor Muhametllari, person nën hetim nga SPAK, në telefonin e të cilit u gjetën komunikime të vazhdueshme me drejtorët e vënë në pranga.
Muhametllari ka pasur komunikime me shtetasin Mariglen Qato dhe Redi Mollën, ndërkohë që kompania 5D, rezultonte fituese e tenderave dhe nga vetë Bashkia e Tiranës.
Në vitin 2021, Nestor Muhametllari e bleu kompaninë V.A.S Konstruksion nga Muhameti Petriti në vlerën e 1 milionë lekëve të rinj, ose më pak se 10 mijë euro. Transaksioni ishte tepër i dyshimtë, për faktin se deri në atë kohë firma në fjali xhironte miliona euro. Vetëm disa muaj më pas, emri i kompanisë ndryshoi nga V.A.S Konstruksion në 5D Konstruksion, ndërsa jozyrtarisht ky emër lidhet pikërisht me ambiciet e drejtorëve, për të pasur një biznes në emër të tyre.
Dosja 5D është cilësuar si një nga goditjet më të mëdha që i është bërë korrupsionit dhe pabarazisë në tendera nga Prokuroria e Posaçme në Bashkinë e Tiranës. Në muajin Mars të vitit 2024, SPAK në një aksion të gjerë, arriti që të vërë në pranga drejtorët më të rëndësishëm të Bashkisë Tiranë, Redi Molla, Mariglen Qato, Taulant Tushe, Deborah Keçi dhe Eglantina Zere për korrupsion, shkelje të barazisë në tendera si dhe mosdeklarim të pasurisë. Megjithatë aktiviteti i kompanisë 5D vazhdon, me ambicien e tyre për t’u shtrirë më tej edhe në zonën e Himarës, ndërsa dy hotele në Durrës dhe në jug të vendit, janë cilësuar si pronë e drejtorëve të Veliajt./Shekulli
