Kjaradeila Icelandair og Félags íslenskra atvinnuflugmanna er „mjög erfið“ að sögn Ástráðs Haraldssonar ríkissáttasemjara.
Hann segir að fundað hafi verið í gær en að engin ákvörðun hafi verið tekin um næsta fund.
„Í því fólst ekki að það væri verið að slíta neinu en menn ætluðu að hugsa hvort að þeir væru með einhvern flöt til þess að halda áfram. Ég mun síðan verða í símasambandi við aðilana um helgina,“ segir Ástráður í samtali við mbl.is.
Reyna að finna samningsflöt
Flugmenn hafa rætt um að þeir vilji sækja sér kjarabætur frá þeim tíma sem þeir gáfu eftir kjör á Covid-tímum en Icelandair hefur sagt frá því að flugmenn séu á góðum kjörum í alþjóðlegu samhengi. Á sama tíma hefur rekstur flugfélagsins verið undir væntingum.
Ertu vongóður um að það finnist einhver samningsflötur?
„Við erum náttúrulega búin að vera að berjast við það núna á einhverjum tíu fundum að finna einhvers konar braut sem að aðilarnir geta fetað.“
„Það hefur ekki gengið neitt ofboðslega vel, satt að segja hefur það verið frekar torsótt,“ segir hann að lokum.
