Soffía Jóhannesdóttir, 93 ára íbúi á hjúkrunarheimilinu Eir, gerði sér leið í klippingu nálægt heimili sínu þegar hindrun varð á vegi hennar í Rimahverfi í Reykjavík.
Um var að ræða illa farna gangstétt, sem eins og sjá má á meðfylgjandi mynd, er löngu tímabært að verði lagfærð.
Framhjól hjólastóls Soffíu, sem aðstoðarmaður ýtti áfram, festist í einni af sprungum gangstéttarinnar með þeim afleiðingum að Soffía féll fram fyrir sig og datt á andlitið.
Hún er marin í andlitinu en slapp við alvarlega áverka eins og beinbrot og heilahristing. Soffía fór á sjúkrahús með sjúkrabíl sem kallaður var á staðinn til að ganga úr skugga um það. Lögregla tók skýrslu af atvikinu.
Þetta segir sonur Soffíu, Hermann Guðmundsson, í samtali við mbl.is. Hann setti inn færslu um slysið á Facebook.
Hermann, Sonur Soffíu, segir bogina verða að laga gangstéttina.
Ljósmynd/Aðsend
Áður orðið slys á sama stað
„Íbúarnir komu nokkrir út til að aðstoða. Þá sögðu þeir henni þessa sögu; að þarna hefðu mörg slys orðið á hlaupahjólum og reiðhjólum. Og barnavagnar hafa steypst fram fyrir sig þarna. Þeir [íbúarnir] eru búnir að benda á þetta í töluvert langan tíma hjá borginni en ekki fengið áheyrn,“ segir Hermann.
„Þetta er bara viðhaldsmál sem borgin þarf að taka alvarlega. Þetta er slysagildra,“ bætir hann við.
Soffía fór í rannsókn á sjúkrahúsið eftir slysið í gær.
Ljósmynd/Aðsend
Slysið varð í Rimahverfi í gær.
Ljósmynd/Aðsend
