Ölgerðin varð fyrir óvenjulegu áfalli og tímabundnu kampavínsleysi þegar heill gámur af lúxusvíni sem pantaður hafði verið frá Moët Chandon hvarf sporlaust við stærstu flutningahöfn Evrópu í Rotterdam.
Um var að ræða sumarsendingu Ölgerðarinnar og liggur ekki annað fyrir en að gámnum hafi verið rænt. Önnur sending af kampavíni hefur þó skilað sér til landsins í tæka tíð fyrir verslunarmannahelgina.
Sendingin var á leið til Íslands og innihélt meðal annars kampavín af tegundunum Moët & Chandon, Veuve Clicquot, Dom Pérignon og rósavínið Whispering Angel.
„Við héldum að sendingin væri komin af stað til Íslands en svo kom bara í ljós að það var enginn gámur til að sækja. Flutningsaðilinn greip bókstaflega í tómt þarna úti. Það var búið að ræna allri sendingunni,“ segir Egill Sigurðsson, vörumerkjastjóri hjá Ölgerðinni.
Egill Sigurðsson.
Þjófar með fágaðan smekk
Ölgerðinni barst í kjölfarið tilkynning frá Moët Hennessy með þeim slæmu fregnum að sendingunni hefði verið rænt. Egill segist aldrei hafa lent í öðru eins. Þekkt sé að einstaka kassar eða flöskur hverfi úr sendingum erlendis; afar sjaldgæft sé þó að heill gámur hverfi sporlaust.
„Þetta gerist víst öðru hvoru hjá þeim úti hjá Moët Hennessy. Þeir leggja mikið upp úr því að dulbúa sendingarnar sínar þannig að ekki sé hægt að sjá hvað er í þeim en þarna virðast þjófarnir annaðhvort hafa verið mjög vel upplýstir eða einfaldlega haft einstaklega fágaðan smekk,“ segir Egill.
Hann hefur starfað hjá Ölgerðinni í 11 ár en man ekki eftir sambærilegu atviki.
„Menn hafa lent í seinkunum, skemmdum eða fengið rangar vörur en við höfum aldrei lent í því að sendingin komi einfaldlega ekki af því að henni var stolið.“
„Þjóðin þarf ekki að óttast kampavínslausa helgi“
Egill bætir við að þjófnaðurinn og tilheyrandi kampavínsleysi hafi átt sér stað á versta mögulega tíma. Hann segir ákveðið „kampavínsæði“ ríkja á Íslandi um þessar mundir.
Tjónið hleypur á mörgum milljónum króna en Moët Hennessy brást hratt og faglega við. Ný sending var útbúin með skömmum fyrirvara og kom til Íslands á mánudag, í tæka tíð fyrir verslunarmannahelgina.
Eftir að fréttir bárust af stuldinum hafði Ölgerðin strax samband við viðskiptavini, upplýsti þá um stöðuna og lagði allt kapp á að hraða nýju sendingunni til landsins.
Nú er unnið að því að koma kampavíninu sem kom til landsins á mánudag út á markaðinn. Vel hafi tekist að tryggja að viðskiptavinir yrðu ekki fyrir langvarandi skorti.
„Þjóðin þarf ekki að óttast kampavínslausa helgi,“ segir Egill.
