Bogi Nils Bogason forstjóri Icelandair segir í samtali við Morgunblaðið að framlenging sérlausnarinnar sé mikilvæg og að það sé unnið áfram í því að fá varanlega lausn.
„Við með íslenskum stjórnvöldum höfum talað fyrir varanlegri lausn hjá Evrópusambandinu til þess að taka tillit til sérstöðu Íslands hérna í miðju Atlantshafinu. Í rekstrinum þurfum við að hugsa og taka ákvarðanir til langs tíma hvað varðar flugvélakaup og fleira. Þess vegna er mikilvægt að hafa langtímafyrirsjáanleika og varanlegar lausnir en ekki skammtímasérlausnir því að þrjú ár eru fljót að líða í okkar grein,“ segir hann.
Borga hlutfallslega meira en margir keppinautar
Kostnaðurinn er mikill og verður áfram þrátt fyrir sérlausnina að sögn Boga.
„Á síðasta ári var umhverfiskostnaður hjá okkur um 5 milljarðar með sérlausninni og ef hún hefði dottið út hefði hann kannski hækkað í kringum 6 milljarða. Sérlausnin tryggir að kostnaðurinn sé ekki að aukast og að við fáum fríheimildir áfram en þrátt fyrir það erum við að borga hlutfallslega meira en margir samkeppnisaðilar okkar og munum við gera það áfram.“
Hann segir að Icelandair og flugrekendur í Evrópu telji heldur óheppilegt að ESB og Evrópa reyni að leysa alþjóðlegt vandamál með staðbundinni lausn. „Flugrekstur er í eðli sínu alþjóðlegur og flugið færist þá bara til á hagkvæmari svæði. Það er mjög mikilvægt að unnið verði að því að finna alþjóðlega lausn en ekki staðbundið kerfi eins og verið er að vinna með núna.“
Hann tekur það sérstaklega fram að þessi ákvörðun sé nýtilkomin og að félagið eigi eftir að rýna frekar í bæði kerfið sem framkvæmdastjórn Evrópusambandsins er að leggja til og hvaða áhrif sérlausnin hefur á það kerfi, Icelandair og Ísland.
„Það er jákvætt að sérlausnin sé framlengd, en það er aldrei heppilegt að vinna með tímabundnar lausnir,“ segir hann.
Bogi Nils Bogason forstjóri Icelandair.
Ljósmynd/Aðsend
Tillit til sérstöðu Íslands
Í tilkynningunni er einnig yfirlýsing frá Þorgerði Katrínu Gunnarsdóttur utanríkisráðherra. Hún segir að þessi niðurstaða sé afrakstur víðtækrar hagsmunagæslu íslenskra stjórnvalda og staðfesti enn og aftur að innan Evrópusambandsins sé vilji til að taka tillit til sérstakra aðstæðna þar sem þær séu fyrir hendi. Hún bætti við á Facebook-síðu sinni:
„Þó að þessu beri að fagna er verkefninu ekki lokið. Við munum áfram vinna að hagsmunum Íslands til lengri tíma – bæði hvað varðar flugsamgöngur og aðra geira þar sem sérstakar aðstæður okkar skipta máli.“
Þorgerður Katrín Gunnarsdóttir utanríkisráðherra.
Ljósmynd/Aðsend
„Rausnarleg túlkun“
Lilja Dögg Alfreðsdóttir formaður Framsóknarflokksins svaraði ummælum utanríkisráðherra á Facebook-síðu sinni.
„Grimm hagsmunagæsla gagnvart ESB kostar þjóðarbúið!“ skrifar hún. „Við Íslendingar getum ekki tekið lest til meginlands Evrópu. Ekki í dag og ekki árið 2030. Flugið er ekki munaður fyrir eyþjóð í Norður-Atlantshafi heldur forsenda atvinnulífs, ferðaþjónustu, viðskipta og tengsla við umheiminn.“
Hún bendir á að það sé mikilvægt að rugla ekki saman tímabundinni sérlausn og varanlegri viðurkenningu á grundvallarhagsmunum Íslands.
„Það er ekki hægt að reka heilt hagkerfi á sérlausnum, undanþágum og stöðugri óvissu gagnvart Evrópusambandinu. Tímanum og orkunni sem lítil íslensk stjórnsýsla ver í að berjast aftur og aftur fyrir sömu sjálfsögðu hagsmununum væri betur varið í að leita nýrra tækifæra, efla verðmætasköpun og bæta lífskjör almennings,“ skrifar Lilja.
Hún segir sérkennilegt að utanríkisráðherra líti á niðurstöðuna sem sönnun þess að Evrópusambandið taki tillit til sérstöðu Íslands, þar sem um sé að ræða tímabundna en ekki varanlega lausn.
„Ef sambandinu væri raunverulega alvara með að viðurkenna landfræðilega stöðu okkar, þá hefði það tilkynnt um varanlega undanþágu í dag en ekki enn eina tímabundna framlenginguna. Að kalla það grimma hagsmunagæslu að fá frest til ársins 2030 er heldur rausnarleg túlkun. Hvað gerist þá? Hefst sami slagurinn á ný með óvissu fyrir íslensk heimili og fyrirtæki?“ skrifar hún að lokum.
