- አንተ የት ጠፍተህ ከርመህ ነው ዛሬ የደወልክልኝ?
- ጋሼ ሰሞኑን ድንገት ጦርነት ተቀሰቀሰ ሲባል ሰምቼ ነው የደወልኩልህ፡፡
- የሰሞኑ እኮ ትንሽ ጦሽ ጦሽ እንጂ ያን ያህል ጦርነት የሚባል አልነበረም፡፡
- ወሬው እኮ በአንዴ ዓለምን ነው ያዳረሰው ጋሼ፡፡
- እንዲህ ዓይነቱ ወሬ ዓለምን በአንዴ እንደሚያዳርስ የታወቀ ነው፡፡
- ጋሼ በቃ አገራችን ሁሌም ከጦርነት ጋር ብቻ ነው እንዴ ስሟ የሚነሳው?
- አስደናቂው ልማታችን እኮ ትኩረት እየተነፈገው እንጂ እጅግ በጣም የሚያኮራ ነው፡፡
- ጋሼ ሁሌም አገራችን ችግር ላይ ሆና አንተ ግን ስለአስደናቂ ልማታችሁ ማውራት ነው የሚቀናህ፡፡
- እናንተ ግማሽ ቀን የተደረገ ለአቅመ ጦርነት የማይበቃ ጦሽ ጦሽ ላይ ስትከርሙ እኛ እዚህ ታሪክ ሠርተናል፡፡
- ኧረ ጋሼ አታስቀኝ እባክህ፣ ደግሞ ምን ዓይነት ታሪክ ሠራችሁ?
- አልሰማሁም እንዳትለኝ ብቻ?
- ጋሼ አንተው ንገረኝ እንጂ አንተ ሠራን የምትለውን ታሪክ ፈፅሞ አልሰማሁም፡፡
- እኔ በበኩሌ አልፈርድብህም፣ ልብህም ሆነ ጆሮህ ያለው የማይረባ ወሬ ላይ ነው፡፡
- ጋሼ ዓለም እየተቀባበለ ያወራውን ጦርነት ለምን ሰማህ እያልከኝ ነው?
- እኔ አልወጣኝም፣ ግን ልማታችንንም በዚህ መጠን ብትከታተል የምልህ ይገባህ ነበር፡፡
- እኔ ያልሰማሁትን፣ እናንተ ደግሞ የሠራችሁትን ታሪክ ለምን አትነግረኝም ታዲያ ጋሼ?
- እኛማ በአንድ ቀን 800 ሚሊዮን እንተክላለን ብለን ከ805 ሚሊዮን በላይ ተክለን ታሪክ ሠራን እልሃለሁ፡፡
- ምንድነው የተከላችሁት ጋሼ?
- መቼም የቴሌኮም ታወር እንዳልሆነ ልብህ ያውቀዋል፡፡
- ጋሼ አንተ ካልነገርከኝ በምን አውቀዋለሁ?
- አንተ ሰንበት እሑድ ነው ካላሉህ አይገባህም ማለት ነው?
- ኧረ ጋሼ ንገረኝ በፈጠረህ?
- አልነግርህም!
[ክቡር ሚኒስትሩ ለስብሰባ የተጋበዙበት ትልቅ ሆቴል በሻይ ሰዓት ከአንድ የተፎካካሪ ፖለቲካ ፓርቲ አመራር ጋር እየተነጋገሩ ነው]
- ከምርጫው በኋላ ምነው ድምፅህ ጠፋ እባክህ?
- ክቡር ሚኒስትር እኔ ባልናገርም ፓርቲዬ ግን አለ፡፡
- እኔ ደግሞ ሦስት የፓርላማ መቀመጫ ካገኛችሁ በኋላ የተደላደላችሁ መስሎኝ ነው ሃ.ሃሃ.ሃ…
- ክቡር ሚኒስትር ዕድሜ ድምፁን ለሰጠን ሕዝባችን፡፡
- አሂሂሂ… እየተዋወቅን?
- ምኑን ነው የምንተዋወቀው ክቡር ሚኒስትር?
- የአገራችን ሰው ምን እንደሚል ታውቃለህ?
- እርስዎ ይንገሩኝ እንጂ ክቡር ሚኒስትር፡፡
- ‹‹ሁሉን ቢናገሩት ሆድ ባዶ ይቀራል›› ነው የሚለው አስተዋዩ ሕዝባችን፡፡
- ክቡር ሚኒስትር ጨዋታውን ካመጡትማ እኔም ሕዝባችን ምን እንደሚል እነግርዎታለሁ፡፡
- በል ቀጥል እየሰማሁህ ነው፡፡
- ‹‹ማወቁንስ እናውቃለን ብንናገር እናልቃለን›› ነው የሚለው ደጉ ሕዝባችን ክቡር ሚኒስትር፡፡
- ወገኛ ነህ፡፡
- ክቡር ሚኒስትር ከምርጫ ወደ ምክክር፣ ከምክክር ወደ ጦርነት እያስገባችሁን ያላችሁት እኮ እናንተ ናችሁ፡፡
- በእኛ እምነት መሠረት ምርጫ አንዱ የዴሞክራሲ ምሰሶ ምክክር ደግሞ አገርን ለማፅናት ሲሆን፣ የጦርነቱ ነገር ወደን ሳይሆን ተገደን የምንገባበት እንደሆነ መቼም ቢሆን የሚጠፋህ አይመስለኝም፡፡
- ክቡር ሚኒስትር ምርጫና ምክክር ማደናገሪያችሁ ሲሆን፣ ጦርነቱን ደግሞ ለሥልጣን ማራዘሚያ እንደምትፈልጉት ነው የሚገባኝ፡፡
- ይኼ ደግሞ ምን ማለት ነው?
- ክቡር ሚኒስትር ግልጽ እኮ ነው፣ ከሰላማዊ ድርድር ይልቅ ጦርነት ብቻ ነው የሚቀናችሁ፡፡
- ይኼ የአንተና የቢጤዎችህ የሴራ ፖለቲካ ድምዳሜ እንደሆነ የታወቀ ነው፡፡
- ምን ማለትዎ ነው ክቡር ሚኒስትር? እኛ እኮ ሰላማዊ የፖለቲካ ተፎካካሪዎች ነን፡፡
- በሁለት ባርኔጣ እንደምትንቀሳቀሱ የማናውቅ መሰለህ?
- ክቡር ሚኒስትር ሊሸነፉ ሲሉ ምክንያት አይደርድሩ፡፡
- አንድ እግራችሁ ጠላት ወረዳ ሌላው በሰላማዊ ፉክክር ስም እዚህ እንዳለ የማናውቅ ይመስልሃል?
- እስቲ አንድ ማስረጃ ያምጡና ይርቱኝ ክቡር ሚኒስትር፡፡
- ጭራሽ ለአንተ ማስረጃ እንዳቀርብልህ ነው የምትፈልገው?
- ያለ ማስረጃማ ሊወነጅሉኝ አይችሉም ክቡር ሚኒስትር፡፡
- አንተና መሰሎችህ እኮ ቀን ምን እንደምታደርጉ፣ ሌሊት ደግሞ ምን እንደምትሸርቡ የማይታወቅ ይመስልሃል?
- ክቡር ሚኒስትር እኔን በከንቱ መወንጀል ትተው ይልቅ ጦርነቱ እንዴት እንደሚቆም ቢነግሩኝ ይሻላል፡፡
- አንድ ቀን ባልሞላ ጊዜ ውስጥ ፀጥ እረጭ ያደረግነውን ማለትህ ነው?
- እኔ ግን አልመሰለኝም ክቡር ሚኒስትር፡፡
- ለማረጋገጥ ከፈለግህ በነጋታው በተረጋጋ ሁኔታ የት እንደነበርን መጠየቅ ብቻ ነው፡፡
- ጉድ እኮ ነው፣ የት ነበራችሁ ክቡር ሚኒስትር?
- ክብረ ወሰን የተሰበረበት ችግኝ ተከላ!
[ክቡር ሚኒስትሩ አመሻሽ ላይ ቢሮ ደርሰው አማካሪያቸውን አስጠርተው እየተነጋገሩ ነው]
- አማካሪያችን የሰሞኑ ጦር ግንባር አጠቃላይ መረጃ ይፋ አልተደረገም እንዴ?
- ክቡር ሚኒስትር የሸረሪና ግንባር ማለትዎ ነው?
- አንተ ሰውዬ የምን ሸረሪት ነው የምታወራው?
- ክቡር ሚኒስትር ውጊያ የተደረበት ቦታ ሸረሪት ሳይሆን ሸረሪና ነው ስሙ፡፡
- እንዲያ ነው የሚባለው?
- አዎን ሸረሪና ነው የሚባለው፣ በጠላት ላይ ከባድ ጉዳት መድረሱ እንዳለ ሆኖ ይፋዊ መረጃ ግን አልተለቀቀም ክቡር ሚኒስትር፡፡
- አንዳንዶቹ አፋቸውን ሞልተው ተሸንፋችሁ ነው ውጊያውን ያቆማችሁት እያሉ ነው፡፡
- ከባድ ድል ማስመዝገባችንን አናምንም የሚሉም እንዳሉ ታውቃለህ?
- ክቡር ሚኒስትር ጠላቶቻችን አሰፍስፈው የሚጠብቁት እኮ ሽንፈታችንን ስለሆነ ነው፡፡
- ተዋቸው እባክህ ምድረ ምቀኛ ሁሉ፣ እነሱን በችግኝ ተከላው ያስመዘግበነው ድልም ያንገብግባቸዋል፡፡
- ክቡር ሚኒስትር ከዚህ የጦርነት ጣጣ ውስጥ ለመውጣት መላ መፈለግም ተገቢ ይመስለኛል፡፡
- አንተ ደግሞ አገራዊ ምክክር ጉባዔ የጀመርንበት አንዱ ምክንያት ለዚህ አይደል እንዴ?
- በእርግጥ ምክክሩ አስፈላጊ ነው፣ ግን አንዳንዶቹ ተመካካሪዎች የሚያስተላልፉት መልዕክት ላይ ሥጋት አለኝ፡፡
- ለምሳሌ?
- ከአገራዊ አንድነትና አብሮነት ይልቅ የበፊት ቁስሎችን እየነካኩ አላስፈላጊ አጀንዳ የሚፈጥሩ አሉ ክቡር ሚኒስትር፡፡
- ከስንዴ መሀል እንክርዳድ እንደማይጠፋው ሁሉ አንዳንዱ ችግር ፈጣሪዎች ቢከሰቱ አይግረምህ፡፡
- ክቡር ሚኒስትር ሙሉ በሙሉ ነጭ የሆነ ነገር ላይ አንዲት የስፒል ጭንቅላት የምታክል ጥቁር ነጥብ ናት ጎልታ የምትታየው፡፡
- ለማንኛውም ሥጋትህ ተገቢ ቢሆንም ያን ያህል አያሳስብህ፡፡
- ክቡር ሚኒስትር ይህ ጉዳይ በእጅጉ ቢታሰብበት ይሻላል፡፡
- አይዞህ አልኩህ እኮ?
- ከአይዞህ ይልቅ ሌላ ቢሉ ይሻላል ክቡር ሚኒስትር፡፡
- ምን ልበልህ እባክህ?
- ተከታትለን ሕጋዊ ዕርምጃ እንወስዳለን ይበሉ ክቡር ሚኒስትር፡፡
- ያለ ፕሮግራሜ አታስቀኝ!
