Fornleifafræðingar hafa fundið leifar eins þeirra mannvirkja sem talin voru til sjö undra fornaldar löngu fyrir Krists burð en þar er um að ræða 22 gríðarmiklar steinblokkir úr vitanum á eyjunni Faros sem var við innsiglinguna að hinni fornegypsku borg Alexandríu, helstu hafnarborg landsins við Miðjarðarhafið.
Vitinn var öldum saman hæsta mannvirki heims þar sem hann teygði sig mót himni en hæð byggingarinnar var einhvers staðar á bilinu 103 til 135 metrar. Hallgrímskirkjuturn er til samanburðar 74,5 metra hár.
Fundur vitarústanna er hluti PHAROS-rannsóknarverkefnisins, sem Evrópusambandið styrkir og miðar að því að endurheimta vistkerfi sjávar, og voru steinblokkirnar, sem nú eru fundnar á hafsbotni, hluti af anddyri vitans en þær eru gríðarmiklar um sig og vega á bilinu 77 til 88 tonn hver.
Virki byggt úr hluta rústanna
Í rúm 1.600 ár lýsti vitinn leið sæfara á Miðjarðarhafi, allt þar til nokkrir jarðskjálfta lögðu þetta gríðarmikla mannvirki að velli en stærstan þátt í því átti skjálfti árið 1303 en síðar var töluvert af byggingarefni vitans notað til að reisa Qaitbay-virkið sem enn þann dag í dag stendur á sama stað.
Nú stendur til að endurreisa vitann með notkun nútímatækni og hafa framkvæmdir við það verkefni þegar hafist með gerð eins nákvæmra þrívíddarlíkana af honum og mögulegt er að skapa miðað við útlit og lögun þess sem fundist hefur af byggingarefni hans.
Sem fyrr segir var vitinn eitt sjö undra fornaldar – sem öll voru á Miðjarðarhafssvæðinu – en hin sex undrin voru talin píramídinn í Gísa, grafhýsi faraósins Khufu, en hann er elstur undranna sjö, talinn frá 25. öld fyrir Krist, hangandi garðarnir í Babýlon, Seifsstyttan í Ólympíu, Artemishofið í Efesos, grafhýsið í Halikarnassos og risastyttan á Ródos.
