കേരളത്തോടുള്ള കേന്ദ്ര സർക്കാറിൻ്റെ അവഗണയുടെ അവശേഷിക്കുന്ന സ്മാരകമായി നിലനിൽക്കുകയാണ് പാലക്കാട് കഞ്ചിക്കോട്ടെ റെയിൽവേ കോച്ചുഫാക്ടറി. ഇത്തവണത്തെ കേന്ദ്രസർക്കാറിൻ്റെ ബജറ്റിലെങ്കിലും ഉൾപ്പെടുമെന്ന പ്രതീക്ഷയിലാണ് കേരളം. സംസ്ഥാന സർക്കാർ ഏറ്റെടുത്ത് റെയില്‍വേക്ക് നൽകിയ 439 ഏക്കര്‍ ഭൂമി കാട് പിടിച്ചു കിടക്കുകയാണ്. കേരളം 13 വർഷം ആയിട്ട് കാത്തിരിക്കുകയാണ് കഞ്ചിക്കോട് കോച്ച് ഫാക്ടറിക്കായി.
വിഎസ് സർക്കാരിന്‍റെ കാലത്ത് ആവിഷ്കരിച്ച പദ്ധതി, അന്നത്തെ പാലക്കാട് എംപിയായിരുന്ന എം ബി രാജേഷിന്റെ ശ്രമഫലമായാണ് റെയിൽവേ ബജറ്റിൽ ഉൾപ്പെടുത്തിയത്. പിന്നീട് 2012-ൽ തിരഞ്ഞെടുപ്പിന് മുന്നോടിയായി ഉമ്മൻ ചാണ്ടി പദ്ധതിക്ക് തറക്കല്ലിട്ടെങ്കിലും, ഒരു വർഷത്തിനുള്ളിൽ പൂർത്തിയാക്കുമെന്ന് പറഞ്ഞ പദ്ധതി പിന്നീട് ഇതുവരെ ഒരിഞ്ചുപോലും മുന്നോട്ട് പോയില്ല.
ALSO READ; ബി ഉണ്ണികൃഷ്ണന് പരിപൂർണ്ണ പിന്തുണ; സംഘടനയെ തകർക്കാൻ ശ്രമിക്കുന്നത് ഡബ്ല്യുസിസി: ഫെഫ്ക
പാലക്കാട് എംപി വികെ ശ്രീകണ്ഠൻ കോച്ച് ഫാക്ടറിക്കായി യാതൊരു ഇടപെടലും നടത്തുന്നില്ലെന്ന് സിപിഐഎം നേതാവ് നിതിൻ കണിച്ചേരി പറഞ്ഞു. നിലവിലെ സാഹചര്യത്തില്‍ കഞ്ചിക്കോട്ടെ കോച്ച് ഫാക്ടറി ആവശ്യമില്ലെന്ന നിലപാടാണ് കേന്ദ്രസര്‍ക്കാരിനെന്നും കേരളത്തോട് പകയാണ് ബിജെപിക്കെന്നും നിതിൻ കണിച്ചേരി ആരോപിച്ചു. വിഎസ് അച്യുതാനന്ദൻ സർക്കാരാണ് കോച്ച് ഫാക്ടറിക്കായി 439 ഏക്കർ ഭൂമി ഏറ്റെടുത്ത് റെയിൽവേക്ക് നൽകിയത്.
