0
Gregorio Rafael Martinez Garces di 47 aña y Alsibiades Jose Cambar Iguaran di 33 aña dia 8 di juni di aña no a bay Eagle Beach pa disfruta di e beyesa di beach aki. Pero nan intencion no a duna resultado pasobra personal di Kustwacht tabata loer nan y aresta nan. Lamentablemente dos otro a logra huy. E delito cu nan a comete tabata purba di importa nada menos cu 732 kilo di droga (marihuana y cocaina). Aki tres siman Corte di Prome Instancia lo anuncia si ta bay di acuerdo cu e castigo di 8 aña exigi door di fiscal.
E acusacion contra e dosnan aki tabata na prome luga di a viola ley di droga y posesion di arma di candela. Abordo di e boto a haya tres arma.
Tur cos a cuminsa ora cu a haya un tip anonimo cu riba 8 di juni lo drenta un boto cu droga. Personal di Kustwacht a bay riba alerta mesora.
Riba e dia en cuestion, cu tabata un diasabra mainta Wardacosta, a detecta un boto sospechoso riba lama yegando costanan di Aruba. Mesora a manda patruya di Wardacosta pa bay detene e boto cu tawata nabegando rumbo pa Eagle Beach. Na momento cu e boto y e cuater personanan a yega costa y tuma nota di autoridad, nan tur a purba huy. E agentenan di Wardacosta a logra detene dos di e personanan, mientras otro dos a logra huy. E dia ey a dicidi di lanta e helicopter tambe pa patruya e area for di laira. Durante control abordo di e boto e agentenan di Wardacosta a haya diferente pakete cu droga y 3 arma lora den un paña.
A confisca un pick-up Mitsubishi cual kier a uza pa subi e boto tera y bay cu ne.
E dos hombernan deteni, tabata uno di nacionalidad Colombiano y e otro Venezolano. Na final e droga abordo tabata 397 kilo di marihuana y 335 kilo di cocaina (total 732 kilo). Un cantidad di droga cu un balor inmenso.
E hues durante tratamento di e caso a haci ambos acusado masha hopi pregunta y di esaki a bini dilanti cu un di nan, Iguaran, a bisa cu e tabata sa cu ta trata di droga pero no e cantidad, mientras cu e otro ta nenga di tabata na altura cu tin droga abordo. Un storia dificil pa kere si supuestamente a contrat’e pa biaha como guardia abordo di e boto.
E acusado inocente ta papia di un cargamento di pisca cu e lo mester a trece Aruba. E cargamento di “pisca” tabata den containernan. Di e arma tampoco e tabata sa algo.
Iguaran tabata manera asistente, pasobra e tabata riba e boto tambe pa cuida e droga, cu e no tabata sa cuanto e tabata.
Abordo, ademas di e revolvernan, a haya un celular den cual tabatin combersacionnan sospechoso, papiando den code. Acusado Iguaran, kende tabata bibando na Aruba di forma ilegal, a bisa cu el a haya ordo di e capitan di e boto pa cumpra 15 liber di marihuana na Venezuela, mirando cu e mercancia aki tabata scars na Aruba. A transferi e placa for di Aruba pa un persona na Venezuela cu mester a percura p’e droga.
Hues sinembargo a mustr’e cu e combersacionnan den codigo tambe tabata papia di cocaina. Pero e ta nenga esey. Den e celular tambe a haya potret di armanan di candela, cu ta mescos cu esunnan confisca. Pero e ta sigui insisti di no sa nada di e armanan.
Iguaran a bisa cu tur esaki el a haci pa nan regla su permiso p’e aki na Aruba, pasobra e tin cinco aña bibando aki di forma ilegal. El a conoce e capitan di e boto den construccion unda nan tabata traha y tabata e capitan tabata esun cu a cuminsa papia di busca droga na Venezuela y a pidie pa bay cu ne, a cambio di logra su permiso. Iguaran na su turno, a busca ayudo di Garces, kende ta un tecnico den drecha motor y tabata esun cu a pone e motornan riba e boto pa bay Venezuela pa busca cabaron y pisca, locual nan a bisa cu lo tabata meta di e biahe.
Hues sinembargo e confronta Garces cu su prome declaracion na Polis, unda cu el a admiti cu e mercancia abordo tabata droga. “No. Esey no ta berdad. Loke cu mi a bisa ta cu e bultonan ta parce droga berdad, pero e no tabata sa cu ta esey e mercancia tabata.”
Fiscal a ripiti tur loke cu tin poni den e dossier y a bisa cu e pruebanan ta suficiente. A pidi un castigo basa riba loke nan tabata envolvi caba den dje den pasado y e cantidad di droga cu nan kier a importa, cu ta mas cu 700 kilo. Pues un castigo di ocho aña. Dia 14 di maart lo tin sentencia den e caso.
