103
E Palabra di Dios ta bisa: Cu si bo confesa cu bo boca, Hesus como Señor y kere den bo curason cu Dios a lanta Hesus for di morto, lo bo ta salba pasobra cu curason hende ta kere pa haya husticia y cu boca e ta confesa pa haya salbacion (Romanonan 10: 9-10).
For di curason di hende ta sali cos bon, cos malo, cos bunita, cos mahos, perversidad y inmoralidad, ladronicia y crimen, amor berdadero y adulterio, odio y violencia, pleito y bringamento.
Cos cu hende ta haci ta den nan curason e ta biba, pasobra tur tipo di deseo ta biba den hende su curason, no ta ningun hende a forsa otro pa haci nada bulgar. T’e curason cu ta desea di haci cos bulgar y e curason cu te ainda tin perversidad den dje ta duna su demostracion.
P’esey e Palabra di Dios ta bisa cu riba tur cos nos mester warda nos curason,
Pica ta wordo forma den mente y curason, pasobra tur locual un hende haci ta wordo forma den su curason. P’esey hopi biaha nan ta bisa cu hende burachi ta papia nan mente y nan curason, bisando cos cu hopi tempo nan tin gana di bisa, pero tabatin mester di un tiki curashi di alcohol, pa por expresa e sentimento cu tin den nan curason. Y hopi biaha na un forma hopi robes.
No gaña bo mes tur locual bo a haci ayera a sali for di bo curason, pasobra tabata bo deseo di hacie y porta awe bo ta sinti berguensa, awe bo tin duele, awe bo ta yora, bo decencia y e placa cu a wordo gasta, na paña y alcohol y despues mas laat gasto n’e warda di polis pasobra despues di baila, bebe, canta y bringa, b’a wordo deteni.
E cosnan aki tur por a wordo preveni, ora e curason ta dedica na Dios, ora Cristo Hesus, tin berdaderamente e prome luga den bo curason, pasobra Cristo Hesus tin e poder di saca scuridad for di den curason di hende.
Dios ta luz y den dj’E no tin nada nada di scuridad. Pero tene cuenta cu bo actitud ta sinta den bo curason y caminda tin scuridad den curason di hende tur sorto di malisia y bagamunderia por tuma luga.
Awendia ora cu coregi un hende ta nifica cu bo a husga e persona, esey t’e defensa cu diabel a hinca den curason di hopi hende, cu aunke nan ta haciendo malo toch ,nan kier evita di tende nan berdad.
Dios a manda Su gran Coreccion aki na mundo pa medio di su unico Yiu Cristo Hesus, pa ken cu kere den dje no bay perdi ma haya bida eterno, Cristo Hesus ta nos Salbacion , y tambe nos gran Coreccion for di e mundo di pica.
Y mientras cu arepentimento berdadero no alcansa nos bida, nos ta sigui den e saus sushi bieu di bida caminda hende lo mustra dede riba nos sperando di mira un cambio di bida, di curason, di actitud, cual solamente por sosode cu un entrega total na Cristo Hesus.
Aspira pa tin paz cu tur hende y santificacion sin cual ningun hende lo mira Señor (Hebreonan 12:14).
Boso no sa cu boso ta e tempel di Dios,y cu e Spirito di Dios ta biba den boso. Si un hende destrui e tempel di Dios, Dios lo destruy’e, pasobra e tempel di Dios ta santo y esey ta loke boso ta (1 Corintionan 3:16)
Sinceramente, Pastoor Marcel Balootje
