Tin hopi hacimento di mal wega , y manipulacion, di hendenan cu ta provoca otro, haci malo cu otro, bisando cu nan mecha ta cortico, nan ta mal hende,nan tin mal rabia, nan no ta pordona, laga Dios pordona, nan ta pordona pero nan no ta lubida, y hopi otro tipo expresion cu ta haci nan un persona dificil pa trata cune, pa hende tin miedo di nan. Pero nan ta lubida cu Dios ta wak tur cos.
Pero Proverbionan 4:24 ta siña nos algo hopi importante: Warda bo curason riba tur cos, pasobra e ta e fuente di bida.
Jeremias 17:9-10 ta para scirbi: E curason ta mas engañoso cu tur cos, y ta totalmente corupto, ken por comprende?
Ami Señor ta scrudiña curason, Mi ta samina mente,pa duna cada un segun su conducta, segun e fruta di su hechonan.
Den Salmo 66: 18 David ta bisa si mi a warda maldad den mi curason, Señor lo no a tendemi.
Tin hopi hende ta haci wega cu Dios, y asina nan berdad wordo bisa den nan cara, nan ta bira falso, y asina purba di haci malo, tin hopi hende hasta esnan creyente cu no ta gusta pa tende e berdad ni tampoco ricibi disiplina y coreccion,pero nan ta lubida cu Dios ta disiplina esun cu Dios ta stima. Y ta pa medio di disiplina y coreccion hende lo yega na crecemento.
Den Marco 7:20-23 Hesus ta splica lo siguiente: Y E a bisa: Loke ta sali for di hende,ta esey ta contamina hende. Pasobra for di paden, for di curason di hende, ta sali mal pensamento,adulterio,hechonan di cudishi,y maldad tambe engaño, sensualidad,envidia,calumnia,orguyo,y bobedad. Tur e maldadnan aki ta sali for di paden y ta contamina hende.
Ora un hende no kier pordona, e falta di pordon ta sali for di su curason, y alcansa su mente, y su boca ta expresa esey pa tur hende por tende, pesey ta algo masha laf ora un hende sa masha bon cu e mester pordona, pa bienestar di su matrimonio, famia, yuinan, ora hende por ehempel ta laga yiu drumi of hasta biba riba caya, pasobra nan no kier pordona.
Pesey poniendo un banda tur sushedad,y tur loke ta keda di maldad,den humildad ricibi e palabra cu a wordo planta den boso,cual por salba boso almanan.( Santiago 1:21).
E bon hende for di su bon tesoro,ta saca loke ta bon,y e mal hende, for di su mal tesoro, ta saca loke ta nalo.(Mateo 12:35).
Hopi biaha tin hende ta sinti nan mes grandi y bon ora nan por haci malo, cu hende, ora nan por tene un hende abao,pero nan ta lubida e condicion di nan curason y nan consenshi, e curason mester ta daña pa e por expresa maldad y e consenshi mester putri pa asina maldad por reina.Y nan dos lo distancia for di Dios, pa asina cumpli cu locual e malbado a ordenan , pasobra nan ta bao di su dominio.
Dios den su inmenso misericordia ta duna nos un mandato cu tur hende cu kier drenta cielo serca Papa Dios mester obedece. Nos mester pordona otro pa asina Dios pordona nos, pasobra si nos no ta pordona otro, Dios tampoco ta pordona nos. Awor con nos ta pensa di drenta cas di Dios, si nos ta para riba cu nos no ta pordona?
Ningun hende lo por tira falta riba otro pa un mandato di Dios, bisando ta pa motibo di tal hende cu mi no kier pordona, pasobra cada ken mester duna cuenta di su mes na Dios.( Romanonan 14:12).
Sinceramente, Pastor Marcel Balootje.
Skirbi pa Pastor Marcel Balootje.