An Däitschland ass de Walkampf en vue vum 23. Februar elo esou richteg lancéiert.
An deem Kontext ass de Lëtzebuerger Premier Luc Frieden den Ament a Bayern bei der CSV-Schwësterpartei CSU hirer „Klausurtagung“. Am Klouschter Seeon huet de Luc Frieden betount, wéi wichteg et fir ganz Europa wär, dass Däitschland eng stabil Regierung kritt. Pierre Jans
D‘Klouschter Seeon am Landkreess Traunstein. Virun der Entrée steet dëser Deeg e grousst CSU-Plakat. An eng Stoppauer mat engem Countdown. A ronn 47 Deeg gëtt et e Politikwiessel an Däitschland an d‘CSU ass iwwerzeegt, dass si zesummen mat der CDU an der nächster Regierung ass. De Lëtzebuerger Invité Luc Frieden stoung och bei de Mikroen virun deem Countdown. Däitschland bréicht nees méi eng stabil Regierung, seet hien. Explizitt mécht de Premier sech op Nofro hin net fir CDU/CSU staark. Awer tëscht den Zeilen.
„D‘Stabilitéit an de leschte Méint oder Joren vun der Ampel-Koalitioun an Däitschland war och vu bausse gekuckt net ganz grouss. Dofir kann ee menger Meenung no dovun ausgoen, dass aus dëser Instabilitéit geléiert gëtt an déi nächst Regierung méi koherent un engem Programm schaffe wäert. Dat ass op d’mannst de Wonsch vu baussen.“
Natierlech géif et un den däitsche Wielerinnen a Wieler leien. Diplomatesch Floskelen. Woubäi se an Däitschland dëser Deeg méi rau Téin aus dem idylleschen Seeon gewinnt sinn. Virun allem déi Gréng kréien es. De Markus Söder widdersprécht dem Kanzlerkandidat vun der Union Friedrich Merz, deen eng Koalitioun mam Robert Habeck senge Gréngen bis elo net kategoresch refuséiert.
„De grénge Wirtschaftsminister ass net kompetent. Dat huet e bewisen. An der Wirtschaft selwer ass hien e gréngt oder rout Duch. Wann d‘Union Schwaarz-Gréng weider staark mécht, gi vill Wieler bei aner Parteien. Definitiv bei d‘AfD.“
Dozou äussert de Luc Frieden sech och op Nofro vun der däitscher Press hin net. Senger Meenung no bräicht et ganz einfach eng staark politesch Mëtt, fir rietse Parteien de Wand aus de Seegelen ze huelen. An eng staark Wirtschaft. Déi wäert wuel grouss Deeler vum Gespréich tëscht him an dem Friedrich Merz anhuelen. Déi Zwee gläiche sech net nëmmen äusserlech e bëssen, allebéid hu se och vill Erfarung an der Privatwirtschaft. An domat den Entrepreneursgeescht. Luc Frieden.
„Mir brauche Wuesstem an Europa an dofir brauch et politesch Ziler, awer och e Kader, deen et erlaabt, dass mir an Europa net hannert den Amerikaner lafen an eis iwwer Progrèsen a China wonneren. Mir mussen et selwer an d‘Hand huelen.“
De Luc Frieden huet a sengem Statement och déi gemeinsam Sécherheetspolitik ugeschwat. De Lëtzebuerger Premier léisst en däregt Thema aus, dat d‘CSU aktuell awer zum Walkampfthema mécht: d‘Migratioun. Den CSU-Fraktiounschef Alexander Dobrindt fënnt kloer Téin:
„Mir wëllen d‘Migratioun nees vum Kapp op d‘Féiss stellen. Mir wëllen, dass och Leit op de Grenzen zeréckgewise ginn. Mir wëllen dass Krimineller ausgewise ginn.“
De Luc Frieden erlieft deemno eng Klausur, wou déi bayresch CSU der CDU net just schéi schwätzt. Awer schéi genuch, fir dass den Androck entsteet, dass tëscht CDU an CSU eng wierklech Unioun besteet fir den 23. Februar.
De Countdown leeft.
