ሀገር ፍቅር፣ ራስ ቴአትር፣ የአዲስ አበባ ቴአትርና ባህል አዳራሽ (ማዘጋጃ ቤት) እና የአዲስ አበባ ሕፃናትና ወጣቶች ቴአትር ቤት ተጠሪነታቸው ለአዲስ አበባ ከተማ አስተዳደር የመንግሥት የልማት ድርጅት ሆነው እንደ አዲስ መቋቋማቸው ይታወቃል፡፡
የአዲስ አበባ ከተማ ቴአትር ቤቶች አስተዳደር ድርጅት ዋና ሥራ አስፈጻሚ አቶ ባረክ ታደሰ ለሪፖርተር እንደሚገልጹት፣ በከተማዋ የሚገኙት አራቱ ቴአትር ቤቶች የአዲስ አበባ ከተማ አስተዳደር የመንግሥት የልማት ድርጅት ሆነው፣ በኅዳር 2016 ዓ.ም. በሕገ ደንብ ሊቋቋሙ ችለዋል፡፡
ቴአትር ቤቶቹ፣ በአዲስ አበባ ከተማ ቴአትር ቤቶች አስተዳደር ድርጅት ሥር ሆነው እንዲተዳደሩ ሲደረግ፣ በሚሠሯቸው ኪነ ጥበባዊ ሥራዎች እንዲለዩ ተደርገዋል የሚሉት አቶ ባረክ፣ በአዲሱ አደረጃጀት ሁሉም ቴአትር ቤቶች የልማት ድርጅት ሆነው የተጣለባቸውን ኃላፊነት እንዲወጡ በሚያስችል መልኩ ዳግም ተዋቅረዋል፡፡
ሀገር ፍቅር ቴአትር ቤት በኢትዮጵያ ብቻ ሳይሆን በአፍሪካም ጭምር በኩር ቴአትር ቤት በመሆኑ በአዲሱ አደረጃጀት መሠረት ትውፊታዊ ሥራዎችን የሚሠራ ይሆናል፡፡ ትውፊታዊ ሥራዎችን ለመሥራት ጥናትና ምርምር የሚጠይቅ በመሆኑ ሥፍራው ድረስ በመሄድ ቋንቋውን፣ ወጉንና ባህሉን በመመርመር ለሕዝብ ዕይታ የማብቃት ሥራ ተጥሎበታል፡፡
‹‹በኢትዮጵያ ከ87 በላይ ብሔር፣ ብሔረሰቦችና ሕዝቦች እንደሚኖሩ ይታወቃል፤›› ያሉት አቶ ባረክ፣ እነኚህ ብሔረሰቦች ከሌላው ዓለም የሚለዩበት የራሳቸው መገለጫ የሆነ ውብ ባህል ያላቸው በመሆኑ፣ ‹‹የእነሱ ሙዚቃ ምን ይመስላል፣ ዜማው ቅኝቱ እንዴት ያለ ነው›› የሚለውን በማጥናት ውበቱና ቀለሙን ሳይለቅ ቱባውን ባህል ጠብቆ እንዲሠራ ይደረጋል ብለዋል፡፡
የውዝዋዜ ጥበብ በኢትዮጵያ ሥርዓተ ትምህርት ውስጥ የሚሰጥ አይደለም፡፡ ብዙዎች ግን በልምድ እየሠሩ ይገኛሉ፡፡ ለወደፊት በአገሪቱ ሥርዓተ ትምህርት ገብቶ በዲፕሎማና በዲግሪ ደረጃ እንዲሰጥ የሚደረግ ቢሆንም፣ እስከዚያ ድረስ ግን ቴአትር ቤቱ ውዝዋዜው ባህላዊ እሴቱን ሳይለቅ እንዲያስቀጥል ሆኗል፡፡
አቶ ባረክ እንደሚሉት፣ ሀገር ፍቅር በሦስቱ ዘርፎች ላይ ሙዚቃ፣ ውዝዋዜና የቴአትር ጥበቦች ትውፊታቸውን በጠበቁ መልኩ እንዲሠሩ በደንብ የተሰጠው ተግባር ነው፡፡
የአዲስ አበባ ቴአትርና ባህል አዳራሽ (ማዘጋጃ ቤት) በአዲሱ የልማት ድርጅት አደረጃጀት ዘመናዊ ቴአትሮችን፣ ሙዚቃዎችንና ዘመናዊ ውዝዋዜዎችን የሚሠራ ይሆናል፡፡
ቴአትር ቤቱ ዘመናዊነትን ሲሠራ የዘመኑ ትውልድ የራሱን ዕሳቤ፣ ማንነቱንና ቀለሙን ሳይለቅ ለአፍሪካና ለመላው ዓለም እንዲያስተዋውቅ ይደረጋል፡፡ ‹‹አዲሱን ትውልድ በዘመናዊ ጥበብ የመቅረፅ ኃላፊነት የወደቀው በቴአትር ቤቱ ላይ ነው፤›› የሚሉት ሥራ አስፈጻሚው፣ በተጨማሪም ቴአትር ቤቱ ከውጭ አገሮች ለሚመጡ እንግዶች ኪናዊ ዝግጅት እንዲያቀርብ በደንብ የተሰጠው ‹‹የሥራ ድርሻም›› ስለመሆኑም ተናግረዋል፡፡
ራስ ቴአትር ቤት በጣሊያን ወረራ ጊዜ በሲኒማ ቤት ደረጃ የተጀመረና ከ1972 ዓ.ም. ጀምሮ በመደበኛነት ቴአትር ማሳየት መጀመሩን የተናገሩት አቶ ባረክ፣ በመሆኑም ቴአትር ቤቱ በአዲሱ አደረጃጀት ሙዚቃን ያለ ሙዚቃ መሣሪያ (በድምፅ ብቻ) የሚሠሩ ባለሙያዎችን እንዲያበቃ ኃላፊነት የተሰጠው ነው፡፡ በተጨማሪም ጀማሪ ከያንያንን በተለያዩ የኪነ ጥበብ ዘርፎች እንዲያሠለጥንና አገር በቀል የሙዚቃ መሣሪያዎችን የሚጫወቱ ባለሙያዎችን ካሉበት ፈልጎ በማምጣት ለዓለም አደባባይ እንዲበቁ የማድረግ ሥራን ይሠራል፡፡
እንደ አቶ ባረክ፣ የሕፃናትና ወጣቶች ቴአትር ቤት፣ ሕፃናትና ወጣቶች እየተማሩና እያነበቡ ኪነ ጥበባዊ ሥራዎችን የሚያበረክቱበት ይሆናል፡፡ ወጣቶች የአገራቸውን ታሪክ፣ ባህልና ቋንቋ በጠበቀ መንገድ ኪናዊ ዝግጅቶች የሚያቀርቡበትና ሕፃናትና ወጣቶች በበሳል ባለሙያዎች፣ በኪናዊ ሥራዎች ተሥለው፣ ተቀርፀውና ተሞርደው እንዲወጡ የሚደረግበት ነው ብለዋል፡፡
ሪፖርተር ያነጋገረው ጸሐፌ ተውኔት ውድነህ ክፍሌ፣ ‹‹ነፍስ በሌለውና አለ ተብሎ በማይነገር ቴአትር ቤት ላይ የአዲስ አበባ ከተማ አስተዳደር የቴአትር ቤቶች አስተዳደር ብሎ አደረጃጀት መፍጠር ለሰሚው የሚገርም ነው፤›› ብሏል፡፡
‹‹ለምሳሌ እነሱ አጠናን እንደሚሉት በሀገር ፍቅር ቴአትር ቤት የሚወጡ ቴአትሮች በሙሉ ትውፊታዊ መሆን አለባቸው የሚል ነው፤›› የሚለው አቶ ውድነህ፣ በቴአትር ቤቱ የሚታዩ ቴአትሮችን ሁሉ ትውፊታዊ ይሁኑ ከተባለ ተመልካች ማግኘት ከባድ ነገር ሊሆን እንደሚችል ያለውን ሥጋት ይገልጻል ።
እንደ አቶ ውድነህ፣ ለፈረሱትና ሥራ ላልጀመሩት ‹‹ለአዲስ አበባ ማዘጋጃ ቴአትር ቤትና ራስ ቴአትር ቤት›› ዕቅድ ወጥቶላቸዋል፡፡ ትውፊታዊ፣ ዘመናዊና ባህላዊ እያሉም ከፋፍለዋቸዋል፣ እንዴት እንዳጠኑት ራሱ የሚደንቅ ነው፡፡ ‘ላም ባልዋለበት ኩበት ለቀማ’ ዓይነት ነገር ስለመሆኑም ያክላል፡፡
‹‹ጥናት የምታደርገው ባለህ ነገር ላይ ተነስተህ ነው፡፡ ሲቀጥል በብዙ ቴአትሮች ላይ መፈተሽ ይኖርበታል፡፡ ከደራሲው፣ ከአዘጋጁና ከባለሙያው ጋር ልትነጋገር ይገባል፤›› የሚለው ጸሐፌ ተውኔት ውድነህ፣ በመሆኑም ጥናቱ መስመሩን የሳተና ትክክለኛውን መንገድ ያልተከተለ ነው፡፡
‹‹ጥናት አካሂደን ቴአትር ቤቶችን እንደ አዲስ አደራጅተናል በሚሉት ሥራ ላይ አንድም የቴአትር ደራሲ በጥናቱ አልተሳተፈም፡፡ ሺሕ ጊዜ ቴአትር ቤት ቢገነባ ለቴአትር ምንጩ ደራሲው ነው፡፡ ደራሲው ሥራ ይዞ ካልመጣ ዋጋ የለውም፡፡ ደራሲው ሲኖር አዘጋጁም ባለሙያውም ይኖራል፡፡ ይህ ሆኖ ባለበት ደራሲውን ያላካተተ ጥናት ውጤት ያመጣል የሚል እምነት የለኝም፤›› ብለዋል፡፡
እንደ ጸሐፌ ተውኔቱ ውድነህ፣ ዛሬ ላይ የቴአትር ደራሲዎች ሸሽተው ያዋጣናል ወደሚሉት የሙያ ዘርፎች ሄደዋል፡፡ ለዚህም ምክንያቱ ቴአትር የማያዋጣ ቢዝነስ በመሆኑ ነው፡፡ ለዚህም አንዱ ምስክር ራሱ ስለመሆኑ ይናገራል፡፡
‹‹ቴአትርን ስለምንወደው የምንሠራው ሥራ ነው፡፡ በዚህ ዘመን አንድ ቴአትር ቤት ለተጋባዥ ተዋንያን ከፍሎ የሚሠራው አምስት መቶ ብር ነው፤›› የሚለው ባለሙያው፣ ይህ ማለት አዲሱ አደረጃጀት ጥናቱን ከደራሲው ብቻ ሳይሆን ከተዋናዩም አንፃር ሊቃኘው የሚገባ ጉዳይ የነበረ ቢሆንም ነገር ግን ዘንግቶታል ብሏል፡፡
በመሆኑም አዲስ ጥናት ሲጠና ቅድሚያ መሬት ላይ ባለ ነገር ሊሆን ይገባል፡፡ ‹‹ በሌለ ቴአትር ቤትና ያልተመለሱ እልፍ የባለሙያዎች ጥያቄ ባለበት ‹የቴአትር ቤቶች ድርጅት› ብሎ ማቋቋም ከፌዝና ቧልት የዘለለ ዕርባና አለው ብዬ አላምንም፤›› ሲል ገልጿል፡፡
