343
CEO di Aruba Tourism Authority (ATA), Ronella Croes, hunto cu su team, a ricibi invitacion pa un reunion cu e formadornan mr. Mike Eman y mr. Gerlien Croes, p’a duna nan un update riba e desaroyonan reciente den e sector turistico. Durante e encuentro, Croes a presenta e plan “Turismo 2030: Un Aruba dushi pa biba y dushi pa bishita”, un documento cu ta propone cambio structural pa mehora e maneho di turismo. ATA a enfatisa e importancia di reorganisa e maneho turistico na nivel gubernamental, incluyendo e creacion di un comision interministerial cu ta coordina e maneho turistico di manera mas integral.
Un di e puntonan clave discuti tabata e necesidad di reorganisa e forma cu ta maneha turismo na Aruba, sigurando cu su impacto positivo beneficia tanto e bishitantenan como e comunidad local. ATA a sugeri e creacion di e “Aruba Quality and Hospitality Authority” pa mehora e regulacion di alohamento y establece un moratorio adecua den e desaroyo hotelero. E medidanan aki ta busca pa garantisa cu e crecemento di e sector no solamente ta faborece e inversionistanan, sino tambe e poblacion di Aruba.
ATA a reconoce cu, aunke turismo ta sigui ta un fuente importante di entrada p’e isla, e comunidad no ta sinti suficientemente su beneficionan. P’esey, den e reunion a presenta proposicion pa reduci e desconexion aki y alinea miho e desaroyo turistico cu e bienestar di e sociedad. Croes a insisti riba e necesidad di fortalece e dialogo cu sector priva y garantisa cu turismo ta un esfuerso colectivo, caminda gobierno, e empresanan y e ciudadanonan traha hunto pa logra un balans entre crecemento economico y e calidad di bida.
Pa mas detaye lesa TREMPAN.
