Romanonan 1:16 ta para skirbi: Pasobra mi no tin berguensa di e evangelio, pasobra esaki ta poder di Dios pa salbacion pa tur cu ta kere.
Juan 3:17 ta para skirbi: Dios no a manda e Yiu den mundo, pa condena mundo, ma pa mundo wordo salba door di djE.
Marco 16:15 ta para skirbi: El a bisa nan: Bay den ter e mundo y predica e evangelio na tur criatura. Esun cu kere y wordo batisa lo ta salba, ma esun cu no ta kere lo ta condena.
E evangelio di Dios ta e instrumento di educacion spiritual mas respeta y responsabel na mundo, pasobra den dje tin poder pa convence hende di nan pica.
Tin hende ta acepta, tin hende no ta acepta, tin ta acepta parcialmente,tin hende ta rechasa completamente y kier continua den e bida di inmoralidad, violencia etc.
Tin hopi ta haci cherche, hopi ta haci bofon, tin hopi ta pretende cu nan por dicidi pa nan mes y cu Dios no tin nada di bisa den nan bida, pero tin un versiculo cu ta contradeci tur pensamento cu ta den rebeldia contra Dios, y ta para skirbi den Juan 3:36:: Esun cu ta kere den e Yiu tin bida eterno: ma esun cu no obedece e Yiu lo no mira bida, ma e furia di Dios ta keda riba dj’E.
2 Pedro 3:9 ta para skirbi; Señor no ta tarda cu su promesa, ma E tin pasenshi cu boso, y no kier pa ningun hende bay perdi, ma pa tur bini na repentimento.
Despues cu nos caba di lesa Juan 3: 16-21 nos ta realisa cu e eror di mas grandi cu un hende por haci den su bida, ta nenga di acepta e plan di Dios pa salbacion den su bida, pasobra un persona asina tin un bida sin ningun speransa.
E evangelio di Dios no ta forsa hende pero e ta splica den un forma hopi facil, cu si bo no acepta e plan di salbacion, cual no ta bini di hende of religion, pero e ta bini di Dios, lo bo no hereda e reino di Dios.
Notabel ta cu e enemigo e diabel a hinca hopi smoesjes den cabes di hende awendia, pa nan no sigui Dios, pa nan sigui den e caminda di scuridad y purba hala mas tanto hende cu nan por den mesun caminda
Echo ta cu ta dos caminda tin esun di luz, cual ta e caminda Dios ta goberna. Y e caminda di scuridad caminda diabel y su compinchi nan ta goberna.
Dios a duna tur hende boluntad propio pa nan por scoge entre bon y malo. Si un hende no scoge pa Cristo Hesus, fierno y lama di candela ta ward’e, pasobra su nomber no ta skirbi den e buki di bida (Revelacion 20:15). Si un hende scoge pa Cristo Hesus, e lo tin bida eterna, ta ward’e den cielo hunto cu e angelnan.
Pasobra e mensahe di e crus ta locura pa esunnan cu ta perese, ma pa nos cu ta wordo salba e ta poder di Dios (1 Corintionan 1:18).
Y mi mensahe y mi predicamento no tabata cu palabra nan persuasivo di sabiduria,ma cu demostracion di e Spirito y di poder, pa boso fe no wordo basa riba e sabiduria di hende, sino riba e poder di Dios (1 Corintionan 2:4).
Nos cas y nos famia, mester di Cristo Hesus, tin hopi mentira ta bay rond, y nos mester para firme contra e plannan di e enemigo.
Sinceramente,
Pastoor Marcel Balootje.