Cada rato tin informacionnan ta sali relaciona cu e investigacion andando riba malversacion na Stichting Sportsubsidie Aruba. Ta bisa cu tin keho entrega pero ainda no ta mira movecion pa yega na e parti di interogacion. Mientrastanto, varios documento a cuminsa sali na cla. Hopi hende malcontento ta sacando e documentonan aki y aparentemente, un parti di nan, for di Cocolishi mes.
Asina por mira den un di e documentonan cu e ordo di pago a bini directamente for di Ministerio di Enseñansa y Deporte di Endy Croes, kende ta ruman di Sandra Croes. E mandatario ta bisa pa paga su ruman e vendor, cu ta su ruman Sandra Croes, 1000 florin. El a duna number di cuenta y cu e adres di e ruman ta na Santa Cruz 101. Esaki tabata pa e Weganan Escolar 2023.
E carta aki ta traha dia 13 di juni, 2023, y firma door di SSA di a ricibie dia 14 di juni, 2023. Otro vendornan mester warda tres luna minimo pa haya pago, pero den e caso aki tin e stempel cu ta bisa “betaald per bank 15 di juni, 2023.” Hopi lihe pues, probablemente pasobra ta ruman di e minister.
Pero e cosnan straño no ta keda eynan. E invoice di Sandra Croes a bini riba nomber di e negoshi “Blush Beauty Salon & Boutique”. A manda e cobransa aki dia 10 di juni, 2023. Tabata e di tres invoice di e negoshi aki pa aña 2023, e momento ey. E siman di 1000 florin ta pa tres evento unda cu el a para Maestra di Ceremonia na evento di Weganan Escolar.
Berdad tabatin un negoshi cu yama Blush Beauty Aruba (diferente cu loke ta para riba e invoice) cu ta registra na e direccion Santa Cruz 36, y no Santa Cruz 101 unda Sandra Croes ta biba, y cual adres e minister a menciona den su ordo di pago. E negoshi tabata un eenmanszaak lanta dia prome di juni, 2014 pero cu a stop di existi dia 5 di september, 2018. Pues lo a traha un cobransa riba factura di un compania fantasma, manera esaki ta mustra.
Pues tin cos cu e minister lo tin cu bay splica. Si ta integro pa uza bo mesun ruman pa maestro di ceremonia, aunke esaki no ta un trabou di confiansa e ta, manera cu Prome Minister mr. Evelyn Wever-Croes a bisa recientemente. Esta cu gobernantenan mester tin hendenan di confiansa rond di nan. No sa ki grado di confiansa un hende mester tin cu un gobernante pa por actua como maestro di ceremonia.
Banda di esaki, e invoice no ta cuadra, entre otro e direccion y e echo cu e no ta existi mas, y e trato preferencial pa haya pago hopi lihe.
Weganan Escolar a tuma luga for di 29 di mei pa 10 di juni, 2023.
