༉ རྒྱལ་ཁབ་ཀྱི་ དཔལ་འབྱོར་བསྐྱར་ཞིབ་ རིམ་སྒྲིག་ཐོག་ གཞི་བཙུགས་འབད་མི་ དཔལ་འབྱོར་ལྷན་ཐབས་ལས་རིམ་དེ་ནང་ར་ གདོང་ལེན་བྱུང་མི་ལུ་བརྟེན་ སྐྱིན་འགྲུལ་བྱིན་ནི་ ཕྱིས་ཡོདཔ་ཨིན་པས།
དུས་ཅི་ ལོ་འགོ་བཙུགས་ཁམས་ཅིག་ཁར་ དམིགས་ཡུལ་ཅན་སྦེ་ འགོ་བཙུགས་མི་ ལས་རིམ་གྱི་འོག་ལུ་ སྐྱིན་འགྲུལ་བྱིན་ནིའི་ མགྱོགས་ཚད་དེ་ རེ་བ་བསྐྱེད་དོ་བཟུམ་སྦེ་ ཐོབ་མི་ཚུགས་དོ་ཡོདཔ་ཨིན་པས།
སྐྱིན་འགྲུལ་གྱི་ ཞུ་ཡིག་ཚུ་ སྤྱི་ཟླ་༡༢ པའི་ཚེས་༣༡ ལས་ མི་ལེན་ནི་ཨིནམ་ལས་ ལས་རིམ་གྱི་ དམིགས་ཡུལ་དེ་ དུས་ཚོད་ཁར་ ག་དེ་སྦེ་ གྲུབ་ཚུགས་ག་ཟེར་ ཚ་གྱང་ཚུ་ཡང་ ཤེས་དོ་ཡོདཔ་ཨིན་པས།
ལས་རིམ་དེ་ ན་ཧིང་ སྤྱི་ཟླ་༥ པའི་ཚེས་༡༨ ལུ་ འགོ་འབྱེད་འབད་ཡོདཔ་ད་ དངུལ་ཀྲམ་ཐེར་འབུམ་༡༥ དེ་ གཞུང་གིས་ ནད་ཡམས་ལུ་བརྟེན་ དཔལ་འབྱོར་མར་བབས་སོང་མི་དེ་ ལོག་ཡར་དྲག་གཏང་ནི་གི་ ཐབས་ལམ་གཙོ་ཅན་ཅིག་ཨིན་པས།
ལས་རིམ་འོག་ལུ་ གཏའ་མ་མེད་པར་ སྐྱེད་བརྒྱ་ཆ་༤ ཐོག་ལུ་ སྐྱིན་འགྲུལ་བྱིན་ནི་དང་ ནད་ཡམས་ལུ་བརྟེན་ ཚོང་འབྲེལ་ལུ་ ཐོ་ཕོག་མི་ ད་རེས་ སྐྱིན་འགྲུལ་ཡོད་མི་དང་ སྐྱིན་འགྲུལ་གསརཔ་ཚུ་ལུ་ སྐྱེད་ཕབ་ཆག་ བརྒྱ་ཆ་༤ འི་ཐོག་ལུ་ སྐྱིན་འགྲུལ་བྱིན་ནིའི་ལས་རིམ་ཚུ་ ཚུད་དེ་ཡོདཔ་ཨིན་པས།
ཕབ་ཆག་ཅན་གྱི་ སྐྱིན་འགྲུལ་ལུ་ དངུལ་ཀྲམ་ཐེར་འབུམ་༣.༣ དང་ ནད་ཡམས་ལུ་བརྟེན་ ཚོང་འབྲེལ་ལུ་ ཐོ་ཕོག་མི་ ད་རེས་ སྐྱིན་འགྲུལ་ཡོད་མི་དང་ སྐྱིན་འགྲུལ་གསརཔ་ཚུ་གི་དོན་ལུ་ དངུལ་ཀྲམ་ཐེར་འབུམ་༢ བགོ་བཀྲམ་འབད་དེ་ ཡོདཔ་ཨིན་པས།
ཨིན་རུང་ ལས་རིམ་༢ ཆ་ར་ མགྱོགས་དྲགས་སྦེ་ མི་འགྱོ་དོ་ཡོདཔ་ཨིན་པས།
རྒྱལ་གཞུང་དངུལ་ལས་དབང་འཛིན་དང་འཁྲིལ་བ་ཅིན་ གྲལ་གཏོགས་ཅན་གྱི་ དངུལ་འབྲེལ་༧ གྱིས་ སྤྱི་ཟླ་༡༡ པའི་ཚེས་༡༤ ནང་འཁོད་ལུ་ ལས་རིམ་དང་པའི་འོག་ལུ་ དངུལ་ཀྲམ་ས་ཡ་༩༦.༦༥ གནས་པའི་ ཞུ་ཡིག་༡༥༨ ཆ་འཇོག་འབད་ཡོདཔ་ཨིན་པས།
དངུལ་འབྲེལ་གཙུག་སྡེ་ཚུ་གིས་ སྐྱིན་འགྲུལ་གྱི་དོན་ལུ་ ཞུ་ཡིག་༡,༢༤༩ ཐོབ་ཡོདཔ་བཞིན་དུ་ དངུལ་ཀྲམ་ཐེར་འབུམ་༢.༨༩ དགོ་པའི་ གྲོས་འཆར་བཀོད་དེ་ ཡོདཔ་ཨིན་པས།
ཞུ་ཡིག་ཚུ་གི་གྲས་ལས་༨༣ ཆ་མེད་བཏང་ཡོདཔ་ད་ ཞུ་ཡིག་གཞན་ཚུ་ དབྱེ་ཞིབ་འབད་བའི་བསྒང་ ཡོདཔ་ཨིན་པས།
ལས་རིམ་ནང་ གྲལ་གཏོགས་འབད་མི་གཙུག་སྡེ་ཚུ་གི་གྲས་ལས་ འབྲུག་གོང་འཕེལ་དངུལ་ཁང་གིས་ སྐྱིན་འགྲུལ་དངུལ་ཀྲམ་ས་ཡ་༦༦.༦༩ གནས་པའི་ ཞུ་ཡིག་༡༤༢ ཆ་འཇོག་འབད་མི་དེ་ མཐོ་ཤོས་ཅིག་ཨིནམ་ད་ དེ་གི་འོག་ལས་ར་ འབྲུག་གི་དངུལ་ཁང་གིས་ སྐྱིན་འགྲུལ་དངུལ་ཀྲམ་ས་ཡ་༢༨.༦༩ གནས་པའི་ ཞུ་ཡིག་༡༣ ཆ་འཇོག་འབད་ཡོདཔ་ཨིན་པས།
དེ་བཟུམ་སྦེ་ འབྲུག་རྒྱལ་ཡོངས་དངུལ་ཁང་གིས་ དངུལ་ཀྲམ་ས་ཡ་༠.༦ གནས་པའི་ ཞུ་ཡིག་༡ དང་ འབྲུག་རྒྱལ་ཉེན་སྲུང་ཚད་ཀྱིས་ སྐྱིན་འགྲུལ་དངུལ་ཀྲམ་ས་ཡ་༠.༦༨ གནས་པའི་ ཞུ་ཡིག་༢ ཆ་འཇོག་འབད་ཡོདཔ་ཨིན་པས།
ལས་སྡེ་ཁག་གི་ཐད་ལུ་ སོ་ནམ་དང་ སྒོ་ནོར་ལས་སྡེ་ནང་ ཞུ་ཡིག་༡,༠༤༧ ལྷོད་མི་ལས་ སྐྱིན་འགྲུལ་དངུལ་ཀྲམ་ས་ཡ་༦༠.༩༤ གནས་པའི་ ཞུ་ཡིག་༡༢༦ རྐྱངམ་གཅིག་ ཆ་འཇོག་འབད་ཡོདཔ་ད་ བཟོ་གྲྭ་ལས་སྡེ་ནང་ ཞུ་ཡིག་༢༠༢ ལྷོད་མི་ལས་ སྐྱིན་འགྲུལ་དངུལ་ཀྲམ་ས་ཡ་༣༥.༧༡ གནས་པའི་ ཞུ་ཡིག་༣༢ ཆ་འཇོག་འབད་ནུག།
རྫོང་ཁག་ཚུ་གི་གྲས་ལས་ ཐིམ་ཕུག་ལས་ ཞུ་ཡིག་༡༤༥ ལྷོད་ཡོད་མི་དེ་ མཐོ་ཤོས་ཅིག་ཨིནམ་ད་ དེ་གི་འོགལས་ བསམ་ལས་རྫོང་ཁག་ལས་ ཞུ་ཡིག་༡༣༦ དེ་ལས་ ཆུ་ཁ་ལས་ ཞུ་ཡིག་༡༣༠ ཡོདཔ་ཨིན་པས།
སོ་ནམ་དང་ སྒོ་ནོར་ལས་སྡེ་ནང་ ཉ་གསོ་སྐྱོང་ཁང་དང་ བྱ་དང་ཕགཔ་གསོ་སྐྱོང་ ནོར་ དེ་ལས་ སེམས་ཅན་གཞན་གསོ་སྐྱོང་འཐབ་ནི་དང་ སོ་ནམ་སྣ་ཚོགས་ སོ་ནམ་འཕྲུལ་ཆས་ སོ་ནམ་གཞི་རྟེན་དང་ སྐྱིན་འགྲུལ་གྱི་ ཞུ་ཡིག་ཚུ་ ཚུད་དེ་ ཡོདཔ་ཨིན་པས།
ཐོན་སྐྱེད་དང་ བཟོ་གྲྭ་ལས་སྡེ་ནང་ བཟའ་ཆས་དང་ སྣུམ་འཁོར་ འཕྲུལ་ཆས་ གློག་མེ་ཅ་ཆས་ དེ་ལས་ ཁྱིམ་དང་ ཡིག་ཚང་ཚུ་ འཕྱག་བརྡར་རྐྱབ་ནི་གི་ ཞུ་ཡིག་ཚུ་ བཙུགས་ཏེ་ཡོད་པའི་ཁར་ གོ་ལ་དང་ ཐགས་རིགས་ རྒྱན་ཆས་ཀྱི་ཚོང་ཁང་ལ་སོགས་པ་ཚུ་ ཡོདཔ་ཨིན་པས།
ལས་རིམ་༢ པའི་འོག་ལུ་ སྐྱིན་འགྲུལ་གྱི་དོན་ལུ་ ཞུ་ཡིག་༨༧ ལྷོད་མི་ལས་༡༣ སྐྱིན་འགྲུལ་དངུལ་ཀྲམ་ས་ཡ་༨༧.༧༣ གནས་པའི་ ཞུ་ཡིག་༡༣ ཆ་འཇོག་འབད་ཡོདཔ་ཨིན་པས།
སོ་ནམ་དང་ སྒོ་ནོར་ལས་སྡེ་ནང་ བཟའ་ཁང་དང་ལྟ་བཤལ་དང་ ཁག་འབགཔ་་ལུ་ སྐྱིན་འགྲུལ་གྱི་ ཞུ་ཡིག་༢ རེ་བརྩིས་ཏེ་ ཞུ་ཡིག་༨ ཆ་འཇོག་འབད་ཡོདཔ་ད་ ས་གཏེར་དང་གཏེར་ཁའི་དོན་ལུ་ ཞུ་ཡིག་༤ ཐོན་སྐྱེད་བཟོ་གྲྭ་༤༤ ཞབས་ཏོག་ལས་སྡེ་ནང་ ཞུ་ཡིག་༨ དེ་ལས་ སྐྱེལ་འདྲེན་ལས་སྡེའི་དོན་ལུ་ ཞུ་ཡིག་༡༩ ཆ་འཇོག་འབད་ཡོདཔ་ཨིན་པས།
དངུལ་འབྲེལ་གཙུག་སྡེ་ཚུ་གིས་ ཞུ་ཡིག་༦ ཆ་མེད་བཏང་ཡོདཔ་བཞིན་དུ་ ཞུ་ཡིག་༦༦ བསྐྱར་ཞིབ་འབད་བའི་བསྒང་ཡོདཔ་ཨིན་པས།
ལས་རིམ་༢ པའི་འོག་ལུ་ འབྲུག་གི་དངུལ་ཁང་ལུ་ ནད་ཡམས་ལུ་བརྟེན་ ཚོང་འབྲེལ་ལུ་ ཐོ་ཕོག་མི་ ད་རེས་ སྐྱིན་འགྲུལ་ཡོད་མི་དང་ སྐྱིན་འགྲུལ་གསརཔ་ཚུ་གི་དོན་ལས་ ཞུ་ཡིག་༢༨ ལྷོད་མི་ལས་༩ ཆ་འཇོག་འབད་ཡོདཔ་ཨིན་པས།
འབྲུག་གོང་འཕེལ་དངུལ་ཁང་ལུ་ ཞུ་ཡིག་༢༡ ལྷོད་མི་ལས་༡ དང་ འབྲུག་རྒྱལ་ཉེན་སྲུང་ཚད་ལུ་ ཞུ་ཡིག་༣ ལྷོད་མི་ས་༢ རྐྱངམ་གཅིག་ ཆ་འཇོག་འབད་ཡོདཔ་ཨིན་པས།
རྫོང་ཁག་ཚུ་གི་གྲས་ལས་ ཐིམ་ཕུག་ལས་ ཞུ་ཡིག་༤༠ ལྷོད་མི་དེ་ མཐོ་ཤོས་ཅིག་ཨིནམ་ད་ ཆུ་ཁ་ལས་༡༦ དང་ གསར་སྤང་ལས་ སྐྱིན་འགྲུལ་གྱི་དོན་ལུ་ ཞུ་ཡིག་༧ ལྷོད་ཡོད་པའི་གནས་ཚུལ།
ཨོ་རྒྱན་རྡོ་རྗེ།
