Et ass de leschte Laf vun der Saison 2024 an hei fält och d’Decisioun ëm den Titel. De Belsch Thierry Neuville huet déi beschte Kaarten.
Dëse Weekend entscheet sech, wien dëst Joer Rallye-Weltmeeschter gëtt. Klore Favorit ass de belschen Thierry Neuville / Martijn Wydaeghe op Hyundai i20 N Rally1. Si hu 25 Punkte Virsprong op den Ott Tänak an de Martin Järveoja, och op Hyundai. Den Duo aus Estland misst hei schonn de Rallye gewannen, iwwerdeem d’Coequipieren aus der Belsch ausfale missten, fir dass se sech den Titel nach kënne sécheren.
E wichtege Weekend ass et dann och fir de Grégoire Munster a säi belsche Copilot Louis Louka. Si fuere jo bei M-Sport op engem Ford Puma Rally1. Aktuell leie si an der Rallye-WM op Plaz 10, dat mat 37 Punkten. Realistesch wier eng 8. Plaz an der Endwäertung. Hei steet aktuell de Spuenier Dani Sordo mat 44 Punkten, deen a Japan net um Depart ass. Op Plaz 9 steet de Sami Pajari mat 41 Punkten, deen an der WRC2-Kategorie a Japan fiert, dat op Toyota GR Yaris Rally2.
De Grégoire Munster, deen déi Lëtzebuerger an déi belsch Nationalitéit huet, huet gutt Erënnerungen un de Rallye a Japan, zumindest wat d’Joer 2022 ugeet. Hei konnt hien deemools mam Hyundai i20 N Rally2 eng 7. Plaz am General feieren a Plaz 1 an der RC2-Kategorie. Domadder konnt hien deemools op sech opmierksam maachen a krut fir 2023 e Cockpit bei M-Sport Ford um Ford Fiesta Rally2. Dorausser huet sech du fir 2024 den Opstig an d’Kinneksklass erginn. Dës ganz Saison ass hie jo mam Ford Puma Rally1 gefuer… fir déi nächst Saison ass do awer nach näischt bestätegt.
Aktuell stinn hannert enger Partie Piloten a Cockpitten nach Fragezeechen, déi eréischt nom Rallye a Japan dierfte geléist ginn.
Rallye Japan – 21 Speciallen iwwer 4 Deeg
Um Donneschdeg ass de Rallye gestart gi mat enger 2.15 Kilometer laanger Superspecial, dat am Toyota Stadium. Séierste war hei den Adrien Fourmaux um Ford Puma, knapp virum Ott Tänak um Hyundai i20 an dem Takamoto Katsuta op Toyota GR Yaris.
De Grégoire Munster läit no der 1. Special op Plaz 7, dat mat 2,8 Sekonne Réckstand op säin Teamkolleeg Fourmaux.
