Luxembourg Air Rescue
RTL|Update: 07.09.2024 15:45
E Freideg am Nomëtteg war eng Persoun un der Rotenfels-Steilwand zu Bad Kreuznach an d’Déift gefall a gouf schwéier verwonnt.
D’Lëtzebuerger Air Rescue war e Freideg de Mëtteg op engem méi spektakulären Asaz zu Bad Kreuznach, net wäit vu Frankfurt ënnerwee. Eng Koppel war op der Rotenfels-Steilwand klammen, wéi de Mann op eemol gefall ass a sech schwéier blesséiert huet.
Et war de Rettungsdéngscht vun Tréier, dee sech du bei der Air Rescue gemellt huet.
No knapp 37 Minutten Fluchzäit ass den Helikopter mat speziell ausgebiltem Personal op der Plaz ukomm a konnt de Mann dunn no knapp 7 Minutten aus der Fielswand retten. De Blesséierte war scho vu Biergretter op der Plaz um Terrain geséchert ginn. De Mann koum an d’Spidol.
De “Rotenfels” ass eng 200 Meter héich an 1.200 Meter laang Steilwand, a gëtt och vum Däitschen Alpenveräin als e schwéiert Klamm-Gebitt ageschat. De Fiels ass steil a relativ brécheg.