Despues di un otro aña di reaccion positivo ricibi pa comunidad di Aruba, Fundacion Anti Droga Aruba (FADA) ta lansa su di seis temporada di documentario basa riba bida real. Den e serie di documentario aki lo ricibi un variacion di storia real.
Storia di entre otro e tristo realidad di bida di adicto ambulante, storia di un persona cu humamento di sigaria a trece consecuencia pa su salud y tambe un topico completamente nobo cu merece hopi atencion, cu ta descalculi.
Hopi biaha nos no ta pensa cu tur e topiconan aki hopi facil por hiba un persona na un desbalansa cu salud mental, of sea un adiccion. Cuarenta aña pasa a funda FADA cu e proposito pa preveni e uzo y abuso di droga y alcohol y otro tipo di adiccion riba nos isla. Ya pa algu aña FADA a start cu un reto nobo unda nos ta brinda prevencion riba cuido di salud mental.
Ta importante pa reconoce y acepta cu uzo di substancia legal of ilegal por conduci na problema cu salud mental y problema cu salud mental por hiba na uzo di droga y alcohol.
Sintonisa awe nochi pa 9:00 pm riba e plataforma aki, p’asina bo haya sa un tiki mas di e storianan aki.