Déifferdeng bleift duerch eng 2:1-Victoire zu Monnerech Leader an de ville Reen huet ee Stréch duerch d’Partie tëscht dem Progrès an dem Racing gemaach.
E Mëttwoch den Owend war am nationale Futtballchampionnat de kompletten 8. Spilldag um Programm.
Ee vun deenen aacht Matcher gouf dobäi net op en Enn gespillt. Zu Nidderkuer huet d’Partie tëscht dem Progrès an dem Stater Racing op Grond vum schlechten Zoustand vum Terrain nom ville Reen an der 31. Minutt missen ofgebrach ginn. Zu deem Zäitpunkt stoung et nach 0:0.
De Champion an Tabelleleader Déifferdeng huet sech dann trotz tëschenzäitlecher Ënnerzuel knapp mat 2:1 zu Monnerech duerchgesat. An enger ausgeglachener éischter Hallschent konnten d’Gäscht duerch en ofgefälschte Schoss vum Juan Bedouret aus 35 Meter a Féierung goen. De Buteur sollt awer nach kuerz virun der Paus vum Terrain fléien, nodeems hien de Ball am Gewulls am eegene Strofraum mat den Hänn geholl an domat de Schoss op den eidele Gol verhënnert hat. Nieft der rouder Kaart ass et een Eelefmeter fir Monnerech ginn, deen de Jordan Swistek sécher fir den 1:1-Ausgläich eraschéisse konnt. Zéng Minutten nom Säitewiessel kruten déi Déifferdenger dann awer selwer een Eelefmeter zougesprach, deen de Gustavo Simoes grad sou sécher markéiert huet. Ee Stéck opootme konnt de Gaascht dann an der 68. Minutt, wéi och déi Monnerecher Ekipp am Numm vum Rui Costa de Sousa déi rout Kaart gesinn huet. Bei schwierege Wiederkonditiounen huet Déifferdeng déi knapp Féierung iwwert d’Zäit bruecht an hëlt déi dräi Punkten um Enn mat Heem.
Hesper huet da géint Rodange näischt ubrenne gelooss a klëmmt no enger klorer 4:0-Victoire an och duerch den ofgebrachene Match tëscht Nidderkuer an dem Racing virleefeg op déi zweet Tabelleplaz. Vun Ufank un huet de Swift d’Partie dominéiert an huet sech no enger Rei Chancë mam 1:0 an der 24. Minutt duerch den Dejvid Sinani belount. Duerch den Ambroise Gboho an eng weider Kéier den Dejvid Sinani ass et mat engem héich verdéngten 3:0 an d’Paus gaangen. An der zweeter Hallschent louch de véierte Gol fir d’Lokalekipp da laang an der Loft. Ronn zéng Minutte viru Schluss ass en dann och duerch een Eelefmeter gefall an domat war definitiv den Deckel op d’Partie gemaach ginn.
Den Detail vun all de Matcher kënnt Dir am RTL-Ticker noliesen.
Den Iwwerbléck vun de Resultater mat de Goler
Beetebuerg – Hueschtert 2:4
0:1 Avdusinovic (21′), 1:1 Dos Santos Gomes (34′), 2:1 Bonet (35′), 2:2 Quinol (40′), 2:3 Leroux (45+1′), 2:4 Avdusinovic (73′)
Jeunesse – Rouspert 1:1
1:0 Jungling (68′), 1:1 Markvoort (80′)
Monnerech – Déifferdeng 1:2
0:1 Bedouret (25′), 1:1 Swistek (45′), 1:2 Simoes (56′)
Hesper – Rodange 4:0
1:0 Sinani (24′), 2:0 Gboho (38′), 3:0 Sinani (44′), 4:0 David (79′)
Péiteng – Wolz 1:0
1:0 Fuss (89′)
Nidderkuer – Racing (ofgebrach)
Munneref – Stroossen 1:1
1:0 Hasanbegovic (46′), 1:1 De Souza (47′)
Diddeleng – Fola 6:1
1:0 Kirch (39′), 2:0 Hadji (46′), 3:0 Benkhedim (58′), 4:0 Schaus (76′), 5:0 Ekeberg (81′), 5:1 Scholler (89′), 6:1 Mendes (90+2′)