0
Dia 10 di october ta Dia Mundial di Salud Mental unda nos ta para keto riba salud mental, e retonan, pero tambe conscientisacion riba e importancia di un salud mental bon y balansa. World Mental Health Federation ta celebra esaki y ta recorda esaki mundialmente, cual ta nifica cu riba e fecha aki ta pone un atencion special n’e tema. Tin algun cifra cu pronto Respaldo lo comparti cu comunidad, pero por bisa caba cu e problemanan di salud mental ta e problemanan cu ta bini mas frecuente na Aruba.
Respaldo semper ta uza e fecha aki pa trece conscientisacion riba salud mental y organisa evento pa trahado, y tambe tin un evento grandi pa conscientisa pueblo tambe riba salud mental. E slogan di e aña aki di World Mental Health Federation ta ‘Salud mental den catastrofe y emergencia’ unda ta pone enfasis con salud mental ta afecta hende cu ta den un emergencia, un pandemia, horcan etc. Pa no lubida cu hendenan pasando door di adversidad tambe mester pone enfasis riba nan salud mental”, segun Caroline Hart, Directora di Respaldo.
Respaldo a caba di forma parti di un Data Management unda a haci ful un compilacion di data di tur instancia di salud mental den region pa compila esaki y compara esaki cu otro. Pronto lo haci esaki conoci y publica cierto cifra di e data aki. A haci por ehempel cierto categoria di malesa di salud mental, categorisa pa hende homber, hende muhe, como tambe edad.
Actualmente Respaldo tin seis psikiatra y nan no ta suficiente pasobra diferente estudio haci ta menciona cu pa trata e populacion di Aruba bo mester mas o menos diescinco. “Bo por imagina bo cu nos ta trahando casi cu un skeleton crew di psikiatra”, segun Hart. Esey ta haci cu e lista di espera ta bira mas largo, un problema comun rond mundo pasobra tur caminda aparentemente tin scarsedad di psikiatra.
