በኢትዮጵያ የመጀመሪያው ከወለድ ነፃ ባንክ በመሆን ወደ ሥራ የገባው ዘምዘም ባንክ ወደ አትራፊነት መሸጋገር በተጠናቀቀው የ2016 ሒሳብ ዓመት ከታክስ በኋላ 110 ሚሊዮን ብር ትርፍ ማትረፉንና በ2017 የሒሳብ ዓመት ያለፉት ስድስት ወራት ደግሞ ከግማሽ ቢሊዮን ብር በላይ ትርፍ ማግኘቱን አስታወቀ፡፡
ዘምዘም ባንክ እሑድ ታኅሳስ 20 ቀን 2017 ዓ.ም. ባካሄደው የባለአክሲዮኖች ጠቅላላ ጉባዔ ላይ እንዳስታወቀው፣ በ2016 የሒሳብ ዓመት ከታክስ በፊት 147 ሚሊዮን ብር ትርፍ አግኝቷል፡፡ ባንኩ በ2015 የሒሳብ ዓመት የ23 ሚሊዮን ብር ኪሳራ ማስመዝገቡ የሚታወስ ነው፡፡
በ2016 የሒሳብ ዓመት ግን ከኪሳራ በመውጣት ወደ አትራፊነት መሸጋገሩ ብቻ ሳይሆን የ2017 የሒሳብ ዓመት አጀማመሩም በአትራፊነቱ የሚዘልቅ ስለመሆኑ ያመላክታል ተብሏል፡፡ በጠቅላላ ጉባዔ ላይ ማብራሪያ የሰጡት የባንኩ የዳይሬክተሮች ቦርድ ሊቀመንበር ናስር ዲኖ (ዶ/ር)፣ ዘምዘም ባንክ በ2017 የሒሳብ ዓመት ያለፉት ስድስት ወራት ውስጥ አመርቂ ውጤት ማስመዝገቡን ጠቁመዋል።
በዘንድሮው የሒሳብ ዓመት የመጀመሪያ ስድስት ወራት ውስጥ ከታክስ በፊት ከግማሽ ቢሊዮን ብር በላይ ማትረፉን፣ ይህም ባንኩ እያሳየ ያለውን ዕድገት እንደሚያመላክት የቦርድ ሊቀመንበሩ ናስር (ዶ/ር) ገልጸዋል።
የዘምዘም ባንክ ዋና ሥራ አስፈጻሚ ወ/ሮ መሊካ በድሪ ለሪፖርተር እንደለገጹትም፣ ባንኩ በ2017 የሒሳብ ዓመት የመጀመሪያ ስድስት ወራት ከታክስ በፊት ከግማሽ ቢሊዮን ብር በላይ ትርፍ ከማግኘቱ ባሻገር በውጭ ምንዛሪ ግኝት ረገድም ጥሩ አፈጻጸም ማሳየቱን ጠቁመዋል።
ዘምዘም ባንክ በተጠናቀቀው የሒሳብ ዓመት አጠቃላይ ያገኘው የውጭ ምንዛሪ ገቢ 30.47 ሚሊዮን ዶላር መሆኑን አስታውሰው፣ ባለፉት ስድስት ወራት ያገኘው ግን 23 ሚሊዮን ዶላር መሆኑን ገልጸዋል። ይህም በ2016 ሒሳብ ዓመት ከተገኘው የውጭ ምንዛሪ 75 በመቶው በስድስት ወራት ውስጥ መገኘቱን ያሳያል ብለዋል፡፡
የባንኩን በ2016 የሒሳብ ዓመት የሥራ አፈጻጸም በተመለከተ ለጠቅላላ ጉባዔው ባቀረቡት ሪፖርታቸውም የፋይናንስ ኢንዱስትሪው በብዙ ተግዳሮቶች ውስጥ ያለፈ ቢሆንም፣ ባንኩ ሁኔታወቹን በፅናት በማለፍና የፋይናንስ አቋሙን በማጠናከር ጉልህ አፈጻጸም ማሳየቱን አመላክተዋል፡፡
ባንኩን ውጤታማ ሊያደርጉ ችለዋል ብለው ከጠቀሷቸው ዋና ዋና የባንክ ሥራ አፈጻጸሞች መካከል በተቀማጭ ገንዘብ አሰባሰብ ረገድ የተገኘውን ውጤት በቀዳሚነት ተጠቅሷዋል፡፡ በዓመቱ ከ1.9 ቢሊዮን ብር በላይ አዲስ ተቀማጭ ገንዘብ በማሰባሰብ አጠቃላይ የተቀማጭ ገንዘብ መጠኑን 6.87 ቢሊዮን ብር ማድረስ ችሏል፡፡ የተቀማጭ ገንዘብ አሰባሰቡ ከቀዳሚ ዓመት አንፃር ሲታይ የ38 በመቶ ብልጫ እንዳለው፣ ነገር ግን የተቀማጭ ገንዘብ ማሰባሰቡ ሥራ ብርቱ ውድድር የነበረበት እንደነበር ሳይገልጹ አላለፉም፡፡
ወ/ሮ መሊካ፣ ባንኩ ያቀረበውን ብድር በተመለከተ በሰጡት ማብራሪያ በተጠናቀቀው የሒሳብ ዓመት 3.12 ቢሊዮን ብር አዲስ በብድር ማቅረቡን ጠቁመዋል። የሰጠውን ብድር መልሶ በመሰብሰብ ረገድ ከፍተኛ ስኬት ማስመዝገብ ችሏል ያሉት ሥራ አስፈጻሚዋ፣ በኢትዮጵያ ብሔራዊ ባንክ የፋይናንሲንግ ገደብ መመርያዎች ጋር በተያያዘ የተወሰኑ ገዳቢ ሁኔታዎች የነበሩ ቢሆንም፣ ከዓመቱ መጨረሻ አጠቃላይ የዘምዘም ባንክ የብድርና የኢንቨስትመንት ሥርጭት 4.63 ቢሊዮን ብር መድረሱን ጠቅሰዋል፡፡
ባንኩ በ2016 የሒሳብ ዓመት ያገኘው ገቢ በ93 በመቶ የጨመረ መሆኑን የገለጹት ናስር (ዶ/ር)፣ በሒሳብ ዓመቱ የባንኩ አጠቃላይ ገቢ 857.9 ሚሊዮን ብር መሆኑንና ወጪው ደግሞ 42 በመቶ ጭማሪ ማሳየቱን ጠቁመዋል።
የባንኩን ደንበኞች ቁጥር ለማሳደግ በተደረገው ጥረት በሒሳብ ዓመቱ ከ177,367 አዳዲስ ደንበኞች በማፍራት የደንበኞቹን ቁጥር 443,629 ማድረስ ችሏል፡፡
ዘምዘም ባንክ አጠቃላይ ሀብት መጠኑ በ36 በመቶ በማሳደግ 9.38 ቢሊዮን ብር ማድረስ መቻሉን የሚገልጸው የሒሳብ ሪፖርት የተከፈለ ካፒታሉንም በ21 በመቶ ማሳደግ 2.05 ቢሊዮን ብር መድረስ ችሏል የባንኩን ካፒታል ከማሳደግ አኳያ ትልቅ ለውጥ እየታየ መሆኑም ተገልጿል፡፡ የኢትዮጵያ ብሔራዊ ባንክ መመርያ መሠረት የተከፈለ ካፒታሉን አምስት ቢሊዮን ብር ለማድረስ ባለአክሲዮኖች ተጨማሪ አክሲዮን ለመግዛት በጠቅላላ ጉባዔው ላይ ቃል መግባታቸውም ታውቋል፡፡ ባንኩ አሁንም ተጨማሪ አክሲዮኖችን እየሸጠ ነው፡፡ የተከፈለ ካፒታሉን ብሔራዊ ባንክ ባስቀመጠው ቀነ ገደብ አምስት ቢሊዮን ብር ለማድረስ የሚቻል መሆኑ ምንም ክርክር የለውም ያሉት ናስር (ዶ/ር)፣ በተለይ ባንኩ ትርፋማነት በተጨባጭ መረጋገጡ በተጨባጭ መረጋገጡ ተጨማሪ አክሲዮኖችን ለመሸጥ የሚያስችል በመሆኑ ጭምር የተከፈለ ካፒታሉን በአጭር ጊዜ እናሟላለን ብለዋል፡፡ በጠቅላላ ጉባዔው ላይ ብዙዎች አክሲዮናቸውን ለማሳደግ ቃል መግባታቸውም የሚፈለገውን ካፒታል ለመሙላት የሚችል መሆኑን አመላክቷል ብለዋል፡፡
ዘምዘም ባንክ በአሁኑ ወቅት የቅርንጫፎችን ቁጥር 84 ያደረሰ ሲሆን፣ ከ750 በላይ ቋሚ ሠራተኞች አሉት፡፡ ባንኩ በተጠናቀቀው የሒሳብ ዓመት 2,927 አዳዲስ ባለአክሲዮኖች ባንኩን የተቀላቀሉ ሲሆን፣ ይህም ጠቅላላ የባለአክሲዮኖቹን ቁጥር 15,736 ሊያደርሰው ችሏል፡፡
