Tin un dicho na Hulandes hopi uza aki na Aruba y esey ta “er is een tijd te komen en er is een tijd te gaan.” Dia 1 di januari 1993 Marco Winterdaal, conoci como Maiky, a drenta den servicio di Arubus como chauffeur di bus. Pa trintiun aña largo el a hiba e pasaheronan na nan destino, sea e persona tabata baha na Playa, Noord, Santa Cruz, Paradera, San Nicolas. Awe, 21 di november 2024, el a baha cu pensioen.
E ta gradici na Henry Barrera, kende ta su sua cu a conseh’e pa aplica na Arubus. El a cuminsa traha tempo di ex-director Bremer. Durante trintiun aña largo, aunke a topa cu algun reto, e tabata cla pa subi bus y haci su trabou. Durante tres decada el a traha diferente shift, cual semper el a bisa no ta un trabou facil.
Den ora di mainta, gerencia di Arubus hunto cu algun colega a bini hunto pa asina bis’e ayo. A gradici Maiky pa su 31 aña cu el a traha cu nan. Tambe a gradici su famia pa presta nan Maiky durante e tempo aki, unda el a sacrifica fechanan importante manera cumpleaños di un ser keri, e dianan di Pasco y hopi mas. E tabata prefera di traha e shift di atardi pa anochi compara cu esun den dia of core schoolbus.
Winterdaal ta cla pa bay disfruta di su pensioen y a bisa ayo na su coleganan, kendenan el a considera nan como un famia. Pa gradicimento, e coleganan a dicidi di regala casa di Maiky un bouquet di flor.
