Den su discurso di Pasco 2024, Rey Willem-Alexander a ofrece un mensahe carga di speransa, union y solidaridad, inspirando riba e palabra di e angelnan durante Nochebuena. Den un cuadro global yena di tension y reto, e monarca a destaca e importancia di construi brug atraves di respet mutuo, empatia y resiliencia, recordando cu nos tur ta valioso y nos ta forma parti di e mesun humanidad.
E discurso a cuminsa cu e palabra di e angelnan n’e pastoornan: “No tene miedo, pasobra mi ta trece bon noticia cu lo ta motibo di gran legria pa henter pueblo.” E palabranan aki, e Rey a señala, ta transmiti un mensahe di inclusion universal: ningun kende ta keda for di e mensahe di Pasco.
Rey Willem-Alexander a reflexiona riba e necesidad di paz den un mundo yena di division. El a menciona e tensionnan internacional y local cu ta genera insiguridad y desconfiansa, señalando cu hopi hende ta sinti nan mes incomprendi, rechasa of desprotegi. El a comparti experiencia personal, manera esun di e studiantenan di e scol hudiu Maimonides na Amsterdam, cu ta biba bao di medida di siguridad debina antisemitismo y esun di e famianan Palestino na Vlaardingen, cu a expresa nan dolor y preocupacion pa nan sernan keri na nan pais di origen.
A pesar di e retonan aki, e monarca a subraya cu nos no ta impotente. Aunke nos no por resolve e conflictonan global grandi, si nos por evita cu e odio y division plama den nos cayanan. El a haci un yamada na respeta e balornan fundamental di Hulanda: Igualdad dilanti ley, rechaso na discriminacion y no recuri na violencia, hasta den momento di frustracion.
Rey a dirigi mensahe directo n’e diferente comunidadnan. N’e Hudiunan Hulandes, el a pidi pa nan keda den e pais, reafirmando nan luga den sociedad. N’e Musulmannan, el a recorda cu Hulanda tambe ta nan hogar. El a expresa cu cada persona tin derecho na busca consuelo y inspiracion den nan creencia, ya sea Cristian, Hudiu, Musulman, Humanista of Ateo y cu tur tin e mesun balor como ser humano.
E discurso a dal un buelta rond di empatia, invitando na reconoce e dolor y e soñonan di otro. “Cualnan ta boso iedo? Cualnan ta boso soño?”, el a puntra, destacando cu e emocionnan aki ta comun pa tur. E reconocemento aki, el a añadi ta habri porta na comprondemento y ta fomebnta conexion.
Cerando su mensahe, Rey Willem-Alexander a cita apostel Pablo: “Alegra cu esunnan cu ta alegre. Yora cu esunnan cu ta yora.” E conseho aki, el a bisa, ta acerca nos na construi un mundo miho, cuminsando pa acto chikito di empatia y solidaridad.
Cu un mensahe di speransa, Rey Willem-Alexander a desea tur hende un Pasco bendiciona, invitando nan na probecha e festividad como un comienso nobo pa paz y union.
