Parlamentario mr. drs. Arthur Dowers, miembro di fraccion di AVP, a expresa su profundo preocupacion p’e cantidad di violacion di norma di bon gobernacion y integridad di parti di minister demisionario Endy Croes. Dowers a laga sa bon cla, cu, aunke e mocion presenta no ta acusa directamente e minister di un crimen, ta condena severamente su forma di maneha e asuntonan publico. “Nos no a tene un investigacion formal, esey ta coresponde na Ministerio Publico,” e parlamentario a splica, “pero loke si ta evidente cu Endy Croes a viola tur regla di bon gobernacion.”
Dowers a recorda un episodio anterior caminda cu Corte a kita e minister di su posicion na Lotto pa mal maneho di miyones di florin, faboreciendo amigo y famia. “Tur e documentacion ta disponibel y ta mustra claramente cu el a traiciona confiansa cu un director mester tin pa proteha un organisacion y lo mas importante, e fondonan publico,” el a comenta. A pesar di e advertencianan cu el a ricibi, Croes a continua cu e mesun practicanan.
Recientemente, un scandal nobo a sali na cla. A señala un director di un fundacion encarga pa distribui fondo na deportista pa desvia cantidad grandi di placa. A pesar di e defensa riba integridad y bon reputacion di e persona aki, e echonan ta mustra lo contrario. “E director aki hasta a ofrece pa bende su auto y haci pago mensual pa debolbe e fondonan, pero e daño ta haci caba,” Dowers a indica.
E parlamentario tambe a haci referencia na otro caso di corupcion den pasado, mencionando un fraude cu paspoort caminda un funcionario, pa colmo primo di e Prome Minister, despues di a sentenci’e, a caba na traha den un entidad publico (RDA), uzando fondo di gobierno pa paga su debe. “E corupcion ta asina sistematico cu ta resulta dificil pa kere cu e personanan aki tin algun sentido di integridad,” e ta lamenta.
Dowers tambe a critica e postura di cierto Parlamentario cu den pasado a denuncia Endy Croes fuertemente, pero cu awo ta defende. “Ta indignante mira con algun ta presenta como cristian, pero ta caba na hustifica e actonan corupto. E ta ainda mas preocupante cu e personanan cu educacion academico ta presenta pa defende e tipo di conducta asina,” el a afirma.
E caso mas reciente, segun Dowers, ta involucra Croes uzando fondo publico na beneficio propio y di su famia, un practica ya condena durante su maneho den Lotto. “Aunke no tin prueba di cada detaye, loke a demostra te aworaki ta suficiente pa conclui cu corupcion ta sigui ta un problema serio den e gobierno,” el a subraya.
Finalmente, Dowers a haci un yamada na Pueblo di Aruba, recordando cu dia 6 di december nan tin e oportunidad pa pone un fin n’e practicanan sistematico aki di abuso di poder y coruupcion votando p a AVP. “Ta momento pa caba cu e inhusticianan aki. Dia 6 di december ta un oportunidad pa pueblo scoge un cambio,” el a conclui.