Rainbow Warriors Core Foundation den e Campaña di Cambio Climatico Aruba 2024 ta enfoca riba e cumbre climatico UNFCCC COP29 tumando luga di dia 11 pa 22 di november 2024 na Baku, Azerbaijan.
Di Aruba solamente Nigel Maduro, den nomber di Caribbean Climate Justice Leaders Academy di Island Innovation ta participando y p’e rason aki nos enfoke ta uza e perspectiva di sociedad civil y hubentud. Den un serie di cinco comunicado nos lo duna un relato di e tratado di cambio climatico, e protocol y e acuerdonan logra den e ultimo decadanan y loke mester acorda durante e cumbre UNFCCC COP29.
TRATADO UNFCCC Y SU OBHETIVONAN
Na 1992 United Nations Conference on Environment and Development organisa na Rio de Janeiro, a habri e proceso pa ratifica e United Nations Framework Convention on Climate Change (UNFCCC), Tratado pa Cambio Climatico en corto. E tratado a drenta na vigor dia 21 maart 1994 y ta conta cu 198 pais ratificador. N’e mesun conferencia na Rio a introduci dos otro tratado, e UN Convention on Biological Diversity y e UN Convention to Combat Desertification, cual tres tratado aki tin como meta pa crea sinergia den e actividadnan cu ta atende cu temanan comparti den e tres tratado aki.
E Tratado pa Cambio Climatico tin como obhetivo final pa “stabillisa e concentracionnan di gasnan di greenhouse effect na un nivel cu lo impedi interferencia antropogenico (induci pa ser humano) den e sistema global climatico”.
Y e tratado ta establece cu tal nivel mester por logra den un plaso suficiente cu lo permiti e ecosistemanan adapta n’e cambio climatico naturalmente, sigura cu produccion di alimento no ta menaza y permiti cu desaroyo economico sigui den un forma sostenibel.
E Tratado pa Cambio Climatico tin varios punto di salida:
- E paisnan desaroya y industrialisa, responsabel principalmente pa emision den pasado y actualmente mester ta esunnan yama pa na nivel nacional haci e reduccionnan mas grandi;
- Dirigi fondo nobo pa asistencia financiero p’e paisnan den desaroyo por actua riba cambio climatico, cual asistencia mediante subsidio y prestamo ta maneha p’e Global Environmental Facility;
- Via e sistema di categoria di pais ratificador di e tratado, cada un cu su mesun obligacion pa raporta riba emision, maneho climatico, accion y colaboracion ta keda vigila e progreso di logro di e obhetivonan di e Tratado.
E tratado ta establece un sistema di categoria di pais ratificador (Partido) di e tratado segun compromiso:
- Annex I: E partidonan ta inclui pais industrialisa miembro di OECD (Organisation for Economic Co-operation and Development) na 1992, mas e paisnan cu economia den transicion (Partido EIT);
- Annex II: E partidonan ta consisti di miembro di OECD den e Annex I, pero no e Partidonan EIT. Nan te rekeri pa provee recurso financiero pa facilita e paisnan den desaroyo tuma accion pa reduccion di emision segun e Tratado, asisti nan den adaptacion na impacto di cambio climatico. Ademas nan mester percura pa tuma tur paso necesario pa promove y transferi tecnologia berde p’e partidonan EIT y e paisnan den desaroyo. E fondonan provee p’e partidonan Annex II ta canalisa mas tanto via e mecanismonan financiero di e Tratado;
- Non-Annex I: E partidonan ta mas bien pais den desaroyo. Ta tene cuenta cu factor adicional di vulnerabilidad y e Tratado tin provision pa atende cu e necesidadnan di pais extra vulnerabel.
E 46 partidonan clasifica como least developed countries (LDCs) pa Nacionan Uni ta haya consideracion special den e Tratado basa riba e echo di e capacidad limita pa responde na cambio climatico y e impactonan adverso. Ta urgi demas partido pa tene cuenta cu e situacion di e LDCs ora ta considera fondo y actividad di transferencia di tecnologia.
ORGANISMO PA CAMBIO CLIMATICO
E areglonan institucional pa duna contenido na e Tratado pa Cambio Climatico, e Kyoto Protocol (venci) y e actual vigente Acuerdo di Paris a establece den e textonan di e respectivo tratadonan.
Colectivamente e institucionnan aki ta participa den e proceso pa desaroya maneho y guia pa sostene partido den e implementacion di e Tratado pa Cambio Climatico, e Kyoto Protocol venci y e vigente Acuerdo di Paris.
E organismo supremo ta e Conference of Parties (COP) pa e Tratado pa Cambio Climatico, e CMP tawata pa e Kyoto Protocol y CMA pa e Acuerdo di Paris;
Ademas tin un organismo pa maneho: the Bureau of the COP, the CMP and the CMA;
Dos organismo subsidiario, permanente ta – e SBSTA y e SBI – y algun organismo subsidiario estableci via e COP, CMP y CMA pa atende cu temanan specifico.
Finalmente tin un Secretariado y entidadnan encarga cy e Mecanismo Financiero, siendo p.e. the Global Environment Facility (GEF) y e Green Climate Fund (GCF).
E trabaonan den cuadro di e Tratado pa Cambio Climatico pa establece e base cientifico di referencia pa determina cual accion mester tuma, ta ser desplega pa e International Panel on Climate Change (IPCC).
KYOTO PROTOCOL
E Kyoto Protocol a ser adopta 11 December 1997 cu duracion te 2015. Debi na un proceso complica di ratificacion ela drenta na vigor 16 februari 2005. Tawata tin 192 Partido cu a ratifica e protocol.
Den corto e Kyoto Protocol a operacionaliza e UNFCCC dor di pone paisnan industrializa y economianan den transicion compromote (mara) nan mes pa limita y reduci nan emisionanan di gasnan di efecto invernadero di acuerdo cu metanan nacionalmente fiha pa tal. E Tratado a pidi e paisnan aki solamente pa adopta politica y medida pa mitigacion y raporta periodicamente.
E Kyoto Protocol tawata basa riba principio y provision di e Tratado y a sigui e structura di Annexo pa Partido. Solamente paisnan desaroya a ser mara, y segun e principio di “responsabilidad comun pero distinto y segun capacidadnan respectivo”,pasobra a reconoce cu nan ta en gran parti responsabel pa e actual nivelnan halto dI gasnan di efecto invernadero den astmosfera.
E Kyoto Protocol a keda remplaza pa e Acuerdo di Paris.
ACUERDO DI PARIS
E acuerdo di Paris ta un tratado internacional cu forza legal pa cambio climatico, adopta pa 196 Partido na e Conference of Parties 21 na Paris 12 December 2015 y a drenta na vigor 4 November 2016.
Su meta ta pa limita keintamento global na hopi menos cu 2°C, preferibelmente bao di 1.5°C., compara cu nivelnan pre-industrial.
E Acuerdo di Paris ta un acuerdo historico pa e proceso multilateral pa atende cu cambio climatico pasobra pa promer biaha tur nacion ta ser uni den un esfuerzo ambicioso pa combati cambio climatico y adapta na su impactonan.
Un componente principal di e Acuerdo di Paris ta Nationally Determined Commitments, den cual ta pone meta numerico na tanto e reduccion, como periodo pa yega na cumplimento cu e requisitonan di e Tratado y ta specifica cual accion lo tuma y tambe comunica con pa crea resiliencia pa e impactonan di cambio climatico.
E Acuerdo di Paris ta provee alaves un framework pa asistencia tecnico, financiero y capacitacion pa tur pais cu tin mester di esaki. Un instrumento ta e Loss and Damage Fund, trata na 2022 na Egipto y 2023 na Dubai, pero no a logra fondo adecua pa cubri daño y perdida di pais impacta pa cambia climatico.
