0
Ora papia di integridad, ta dificil pa kere cu partido MEP a hiba un gobernacion digno y respetuoso pa cu pueblo di Aruba, caminda e caso cu e siman aki a bira conoci contra di ex-minister y ex-miembro di partido MEP, Glenbert Croes. Ni con cu bira tur loke a bin dilanti, sea lesa e documentonan boca’bou of di banda, no por hustifica corda aproba e desaroyonan cu a tuma luga caminda tin cu menciona cu husticia tin hopi trabou pa haci contra tur esunnan envolvi.
Por papia cu hopi confiansa cu tin miembronan di hunta di comisario di sigur dos compania estatal, cu nan ta complice di loke Glenbert Croes a haci y cu nan tambe tin cu wordo teni responsabel pa esaki. Como miembro di hunta di comisario, e personanan aki ta responsabel pa salvaguardia e interes di pueblo den companianan cu ta di pueblo pero no a haci esaki ya cu sano huicio no a prevalece den e caso aki cu ainda tin cu haya un nomber na Ministerio Publico.
Ta un secreto publico cu e caso contra di ex-minister Glenbert Croes a acapara atencion tanto aki na Aruba como otro paisnan den Reino Hulandes, tur hende tabata sa di su detencion, tur hende tabata sa cu oficialnan di Landsrecherche y RST a hib’e pa un oficina cu RST tin den Marinierskazerne na Savaneta,
Tambe tur hende tabata sa cu Glenbert Croes a bira malo durante di interogacion y e mester a wordo transporta pa dr Horacio Oduber Hospital y tambe tur hende tabata na altura cu despues Procurador General a dicidi pa laga e ex-minister regresa su cas pa cuida su salud.
Pero e ora a surgi un momento caminda uzando un expresion na Hulandes cu ta bisa: “en toen was het stil” ya cu no a tende mas of miho bisa, ningun desaroyo mas den e caso Portulaca te dia di awe. Mientrastanto ta mustra comosifuera e sospechoso a dicidi di bay over na saca probecho di e espacio di libertad cu autoridadnan hudicial a brind’e cu man habri caminda den menos c’un luna, sabiendo cu e ta bou di investigacion, sabiendo cu e ta cobrando “overbrugginstoelage” y cu su persona ta bon conoci kico e por y kico e no por ora cu e ta cobrando e placa aki, e ta bira lanta un “eenmanszaak”, inscribi na Camara di Comercio y na luna di januari e ta firma un acuerdo pa actua como consehero pa AWSS y despues tambe cu Utilities Aruba NV.
Ta dificil pa kere cu miembronan di tur compania estatal no sa di e situacion den cual e yiu di Betico Croes den feliz memoria, a haya su mes aden, sigur esunnan cu ta cerca di partido MEP cu tambe ta forma parti di un of otro directiva di e companianan aki. Sabiendo esaki, nan a acepta y acorda un contract cu e compania ILOG Advisors maneha pa Glenbert Croes y varios di e personanan aki, recientemente a hiba gobierno Corta ya cu nan a wordo retira y tabata kier compensacion pa e hecho cu nan a ser manda cas, ya nan a ser nombra pa e gobierno saliente y ta mas cu claro cu e gobierno nobo kier su propio hendenan di confiansa den e companianan estatal.
Un total di 15 miembro di diferente hunta di comisario a busca nan derecho na Corte y nan a haya nan rason pero ta lanta e pregunta si e caso di Glenbert Croes ta practicamente hustifica nan retiro y te con leu nan por wordo poni responsabel pa tur loke a tuma luga entre luna di januari pa luna di mei di e aña aki ora cu e contract di Glenbert Croes a wordo ehecuta.
Ta cosnan cu simplemente no por “praat goed” ya cu realmente ta cosnan malo, cosnan cu ta mustra riba un falta di integridad total na momento di eherce nan profesion.
