በሱራፌል አሸብር
የአሜሪካ ኤምባሲ ዓለም አቀፍ የትምህርት ሳምንት መከበርን አስመልክቶ ለኢትዮጵያ ሳይንስ አካዴሚ 522,000 ዶላር ድጋፍ አደረገ፡፡
ኅዳር 9 ቀን 2017 ዓ.ም. በአካዴሚው በተዘጋጀው በመድረክም፣ ድጋፉ የመንግሥት ዩኒቨርሲቲዎችን ራስ ገዝ የመሆን ጉዞ ለመደገፍ የታለመ መሆኑ ተገልጿል፡፡
በራስ ገዝነት ሒደት ላይ የሚገኙትን አርባ ምንጭ ዩኒቨርሲቲ፣ ሐሮማያ ዩኒቨርሲቲ፣ ጅማ ዩኒቨርሲቲ፣ ጎንደር ዩኒቨርሲቲ፣ ደብረ ብርሃን ዩኒቨርሲቲን ጨምሮ ዘጠኝ የመንግሥት ዩኒቨርሲቲዎች የድጋፉ ተጠቃሚ እንደሚሆኑ በኢትዮጵያ የአሜሪካ አምባሳደር ኤርቪን ማሲንጋ ተናግረዋል፡፡
የትምህርት ዕድገትን መደገፍ ዓለም አቀፋዊ ትስስርን እንደሚያጠናክር፣ ለዚህም የአሜሪካ መንግሥት መሰል ድጋፎችን አጠናክሮ እንደሚቀጥልም ተናግረዋል፡፡
የኢትዮጵያ ሳይንስ አካዴሚ ፕሬዚዳንት በላይ ካሳ (ፕሮፌሰር) ከሪፖርተር ጋር በነበራቸው ቆይታ ፣ የራስ ገዝነት ሒደትን የጀመሩ ዘጠኝ ዩኒቨርሲቲዎችን ለመደገፍ የፖሊሲ መዝገቦችና የስትራቴጂክ ዕቅዶች እንደሚዘጋጁና የሰው ኃይል ሥልጠናዎች እንደሚሰጥ ገልጸው፣ ከመንግሥት በጀት ተላቀው ራሳቸውን በራሳቸው የሚያስተዳድሩበት አቅም ለመፍጠርም የበኩላቸውን እንደሚወጡ ተናግረዋል፡፡
የትምህርት ሚኒስቴር የከፍተኛ ትምህርት አስተዳደር ዋና ሥራ አስፈጻሚ ሰለሞን አብርሃ (ዶ/ር) በበኩላቸው፣ ‹‹የተገነቡ ዩኒቨርሲቲዎችን ብቁና ተወዳዳሪ ለማድረግ ከሚሠሩ ሥራዎች ውስጥ አንዱ ዩኒቨርሲቲዎችን ራስ ገዝ ማድረግ መሆኑን አስታውሰው፣ ይህም ለኢትዮጵያ የከፍተኛ ትምህርት ዕድገት ጉልህ አስተዋጽኦ እንደሚያበረክት ተናግረዋል፡፡
የከፍተኛ ትምህርት ተቋማዊ ነፃነት መኖር ጥሩ የመማር ማስተማር አፈጻጸም እንዲኖር እንደሚያደርግም አክለዋል፡፡
በቀድሞ የውጭ ጉዳይ ሚኒስትር ብላቴን ጌታ ኅሩይ ወልደ ሥላሴ የመኖሪያ ቤት መቀመጫውን ያደረገው የኢትዮጵያ ሳይንስ አካዴሚ የተቋቋመው በ2010 ዓ.ም. ሲሆን፣ ዕውቅናውን ያገኘውም በአዋጅ ቁጥር 783/2013 ዓ.ም. ነው፡፡
አካዴሚው ከሚሠራቸው ሥራዎች መካከል የኢትዮጵያ ምሁራን ሳይንሳዊ ኅትመቶች ለሕዝብ ተደራሽ የሚሆንበትን መድረክ ማዘጋጀት፣ ጉባዔዎችንና ዓውደ ጥናቶችን ማደራጀት፣ ደረጃና ዕውቅናን መስጠት ይገኙበታል፡፡
