Finall bei den Dammen
Ted Koob|Update: 08.09.2024 00:20
D’Spillerin aus Belarus huet sech an enger héichklasseger Finall mat 7:5 a 7:5 géint d’Amerikanerin Jessica Pegula duerchgesat.
Fir d’Aryna Sabalenka war et den éischten Titel zu New York bei den US Open an den 3. Grand-Slam-Titel an hirer Karriär.
Am éischte Saz gouf et direkt eng Rei Breaken op béide Säiten. Fir d’éischt goung d’Pegula mat 2:1 a Féierung, éier d’Sabalenka 3 Jeuen um Stéck gewonnen huet. Beim Stand vun 3:5 aus hirer Siicht, konnt d’Amerikanerin dem Sabalenka awer nees den Opschlag ofhuelen. Nodeems si hire Service och hale konnt stoung et nees 5:5 gläich. D’Spillerin aus Belarus war awer elo och nees besser an der Partie an hat beim 6:5 e puer Sazbäll. Mam 5. Sazball konnt d’Sabalenka de Punkt maachen an den 1. Saz mat 7:5 gewannen.
Am 2. Saz konnt d’Amerikanerin de Niveau an hirem Spill net halen an et stoung séier 3:0 fir d’Sabalenka. D’Pegula huet sech awer och an dee Saz zeréckgekämpft a konnt 5 Spiller um Stéck gewannen. Hier Géignerin konnt an der Suite nees reagéieren an op 5:5 ausgläichen. D’Finall huet dovu gelieft, datt béid Spillerinnen a schwéiere Momenter den Niveau vun hirem Spill gehuewen hunn. De Momentum war nees op der Säit vun der Belarussin a si konnt och déi nächst zwee Jeue gewannen. No enger Stonn a 54 Minutte konnt d’Aryna Sabalenka d’Äerm an d’Luucht hiewen an den Titel zu New York feieren.