Den US-Technologie-Gigant Apple mécht d’EU an d’Reegele vum Konkurrenzrecht responsabel, dass an Europa elo d’App “Hot Tub” fir iPhone ze kréien ass.
“Mir sinn zudéifst besuergt iwwert d’Sécherheetsrisiken, déi Hardcore-Porno-Appen vun dëser Zort fir d’Notzer an der EU, besonnesch fir Kanner, mat sech bréngen. Dat erkläert Apple der Agence AFP géigeniwwer. D’EU-Kommissioun “zwéngt eis, App-Storen wéi “Altstore” oder “Epic” zouzeloossen, déi eis Bedenken am Kader vun der Sécherheet vun eisen Notzer eventuell net deelen”, sou Apple weider.
D’App Hot Tub huet am Virfeld erkläert, “déi éischt vun Apple zougeloosse Porno-App” ze sinn. Apple widdersprécht hei: “Mir fannen dës App ganz sécher net gutt a géife si nimools an eisem App Store ubidden”. Iwwert den alternativen App-Store Altstore PAL fir iPhone ass se awer ze kréien.
Apple war jo laang Zäit extrem restriktiv an huet bis viru Kuerzem keng aner Appstoren, ausser deen offizielle vun Apple, fir iPhonen zougelooss. Ënnert anerem Epic Games huet Apple doropshin virgehäit, seng Stellung um Marché auszenotzen. D’EU ass dunn kartell-rechtlech dogéint virgaangen an huet Apple virgehäit, onofhängeg App-Entwéckler ze benodeelegen an eege Servicer, wéi zum Beispill Apple Pay, ze prioriséieren. Als Konsequenz huet Apple d’Reegele fir d’User an der EU manner restriktiv gemaach.