De Weekend ass an der Formel 1 de véierte vu sechs Sprint-Weekender. Gefuer gëtt zu Austin an den USA.
De Formel-1-Weltmeeschter Max Verstappen start e Samschdeg am Sprint vun der éischter Plaz. Den Hollänner war mat sengem Red Bull an der Schlussronn 12 Dausendstel méi séier wéi den George Russell op Mercedes. Aus der zweeter Rei starten de Charles Leclerc op Ferrari an de Lando Norris op McLaren.
De Verstappen huet mat senger séierster Zäit am Sprint-Qualifying een éischt Zeeche gesat. Sechs Coursse viru Schluss läit den Hollänner 52 Punkte viru sengem grousse Konkurrent ëm de WM-Titel Lando Norris.
Am SQ1 war iwwerraschend scho Schluss fir den Oscar Piastri op McLaren. Seng Zäit war wéinst den Tracklimits gestrach ginn. Feierowend haten och déi zwee Sauber-Pilote Valtteri Bottas an Zhou Guanyu, den Alexander Albon op Williams an den Esteban Ocon op Alpine.
Am SQ2 war Schluss fir de Red-Bull-Teamkolleeg vum Verstappen, de Sergio Perez. Eliminéiert goufen och de Pierre Gasly op Alpine, de Liam Lawson op RB an déi zwee Alpine-Pilote Fernando Alonso a Lance Stroll.
E Samschdeg den Owend geet et zu Austin weider mam Sprint. Den Depart ass um 20 Auer, ier dann nach um Hallefnuecht de Qualifying fir de Grousse Präis vun den USA op d’Pilote waart. Op RTL kënnt Dir live mat dobäi sinn.