Aunke cu Crisis Management Office Aruba (CMO) a informa e publico en general cu riba diahuebs, 14 di november, lo a tuma luga un entrenamento nacional pa certificacion aeropuerto di Aruba, e cantidad di alarma cu por a scucha den oranan di anochi a spanta hopi hende.
Por a mira un cantidad grandi di auto di polis, di Ambulance y Bombero tur bayendo mesun direccion di waf. E yamadanan a drenta na cantidad na oficina di 24ora y Trempan cu algo grandi ta pasando.
Sinembargo no tabatin nada. Tabata trata di un simulacro di un accidente cu a cay den lama, cerca di waf di Playa.
Por a compronde cu e training a bay super bon. El a conta cu participacion di tur e instancianan nacional relevante.
Coordinacion tabata den man di Crisis Management Office (CMO) hunto cu e otro instancianan clave manera Brandweer, Polis, Imsan, Departamento di Salud Publico, Departamento di Asunto Social, Kustwacht, Aruba Airport Authority N.V., Aruba Ports Authority y Directie Luchtvaart pa garantisa siguridad y e capacidad di conocemento y material den caso di un incidente aereo.
Pa e proposito aki, lo ta evaluando e plan di respuesta nacional pa accidente aeronautico, cu participacion di diferente instancianan di emergencia. Pa e operativo aki a uza ekipo avansa, y hasta un helicopter di Kustwacht a forma parti den e ehercicio.
