No ta un secreto cu nos ta bibando den tempo nan mas calor cu nunca. Esaki tambe ta un precupacion cu ta bibando pa ultimo aña nan cerca e parokianonan di Brazil.
Un calor inmenso ta stroba e fielnan di asisti n’e celebracion di misa. Frecuentemente ta e keho y preocupacion nan cu a lanta bou di e parokianonan, te hasta orario nan a wordo adapta pa celebra Santa Misa pa evita e calor.
E iniciativa a lanta bou di e propio parokianonan y grupo di Emaus pa di e forma aki forma un comision pa recauda fondo cu varios actividad pa pone sistema di airco den misa. Entre otro a recauda fondo pa medio di benta di cuminda, rifa pero esaki nan no ta duna nan fondonan necesario pa por logra nan meta.
Pa e motibo aki mes dia 8 de november proximo lo organisa un bingo den Club Caiquetio caminda ta conta cu sosten y generosidad di e fielnan di parokia di Brazil y henter Aruba.
Bingo di Parokia Cristo Rey lo ta ariba un diasabra anochi y porta di club ta habri for di 6:00 pm en adelante. Ya caba e carchinan di bingo ta riba mercado caba y tambe cerca tur parokiano na rason di Fl.10,= pa bingo. Un total di 10 wega lo wordo hunga e anochi di bingo. Tene na cuenta cu bingo ta cuminsa net 8:00 pm y ta termina pa 11:00 pm.
Bar y cushina ta bon surti y tambe durante di anochi aki nos lo tin rifa di varios doorprizenan atractivo pa tur esnan cu asisti.
Pa bingo y/o cualkier contribucion por tuma contacto cu Pastor Andry na 567-1122 of 584-7106.